Seysenbi, 4 Tamız 2020
COVID-19 QAZAQSTANDA. Jwqtırğandar — 93820. Jazılğandar — 65132. Qaytıs bolğandar — 1058
Koronavirus 1203 9 pikir 10 Şilde, 2020 sağat 14:39

Koronaviruspen küreske qanşa qarajat bölindi?

Koronaviruspen küreske tağı 150 milliard teñge bölinedi. Bwl turalı ükimettiñ keñeytilgen otırısında memleket basşısı Qasım-Jomart Toqaev mälimdedi. 

«Ükimet pen öñirler pandemiyamen küreste şwğıl mäselelerdi şeşu üşin 150 milliard teñge böledi. Negizgi mindet - koronavirustıñ taraluın toqtatu jäne nauqastardı emdeude aytarlıqtay nätijege qol jetkizu», - dedi prezident.

Bärimiz biletindey, bwl - koronaviruspen küreske bölingen alğaşqı qarjı emes. Biraq elde indettiñ beti qaytqan joq. Qayta kün sayın örşip bara jatqanday. Täuligine mıñnan asa adam virus jwqtırıp jatır.

Eñ ökiniştisi osınday qiın-qıstau künde de sıbaylas jemqorlıq tolastamay twr. Koronaviruspen küreske bölingen qarjını jımqırğan jemqorlar men därigerlerge tölenetin qosımşa ötemaqını qaltağa basqan basşılar jaylı aqparat jeterlik. Viruspen küreske byudjetten mol qarjı bölinse de, indettiñ joyılmauına osı jemqorlıq ta qattı äser etip twrğan sekildi.

Endi köktemnen beri koronaviruspen küreske qanşa qarjı bölingenin eseptep köreyik. Mamır ayında koronavirusqa qarsı küreske Qazaqstan 6 trln teñgege juıq qarajat jwmsadı degen aqparat taradı. Bwl şamamen 13 milliard dollar nemese wlttıq JİÖ-niñ 8 payızı. Biraq mwnşa mol qarjınıñ esebin eşkim bergen joq. Qaşan bölindi, qayda jwmsaldı, nätijesi qanday? Bwl swraqtar sol beti jauapsız qaldı...

Densaulıq saqtau ministri Aleksey Coy 7 şildede koronaviruspen küreske Ükimet rezervi men respublikalıq bdjetten qanşa qarajat bölingenin jäne ol qarajattıñ qayda jwmsalğanın aytıp, esep bergen boldı.

Onıñ aytuınşa, pandemiya kezinde koronavirus infekciyasımen küres üşin, onıñ payda boluı men indettiñ betin qaytaru üşin 114 milliard 826 million teñge bölingen. Mwnıñ 40 milliard 58 million teñgesi ükimet rezervinen, al 74 milliardı respblikalıq byudjetten bölingen.

Densaulıq saqtau ministri Coy 114 milliardtıñ esebin tügendep bergenimen, sözi qarjı ministrliginiñ esebimen birdey şıqpay qaldı. Qarjı ministriniñ birinşi orınbasarı Berik Şolpanqwlovtıñ aytuınşa, elimizde koronaviruspen küreske 191 mlrd teñgeden astam qarjı bölingen.

«Bügingi künge koronaviruspen küreske respublikalıq byudjetten 191,9 mlrd teñge bölinip otır. Onıñ 125 mlrd teñgesi byudjetti naqtılau ayasında, 66,9 mlrd teñgesi Ükimet rezervinen bölingen. Qarajat maqsattı bağıttarğa jwmsaladı.  Bwdan basqa, QR Densaulıq saqtau ministrligi tarapınan Medicinalıq qızmetter sapasın baqılau komiteti arqılı da körsetiletin medicinalıq qızmetterge baqılau jürgizilip, qadağalanadı», – deydi Şolpanqwlov.

Qarjı ministrliginiñ esebi aqparat qwraldarında 8 şilde küni jariyalandı. Aleksey Coydan bir kün keyin. Endeşe eki ministrlik eki künniñ işinde eki türli esep soğıp otırğanı qalay? Kim ötirik aytıp otır? Älde biz dwrıs tüsinbedik pe?

Abai.kz

9 pikir