Seysenbi, 31 Naurız 2020
46 - söz 5589 0 pikir 19 Tamız, 2014 sağat 13:13

OQUŞI KIİMİN NEGE ÖZİMİZDE TİKPESKE…

Tamız ayınıñ alğaşqı onkündigi ötisimen-aq elimizdiñ tükpir-tükpirinde «Mektepke jol» akciyasınıñ jürgiziluine oray järmeñkeler öz jwmıstarın bastap ketti.  Biıl elimizde 300 mıñğa juıq bala birinşi sınıpqa baradı. Tek Almatınıñ özinde 23500 büldirşin alğaş ret mektep tabaldırığın attaydı eken.

Osı orayda mektep oquşıları kietin kiimniñ poşımın, bağasın bilu maqsatında  Gagarin dañğılı, №294-üydiñ aldında ornalasqan sauda ornına barıp kördik. «Angelcher» mektep oquşılarınıñ kiim ülgileri QR Memlekettik standarttarına säykes keledi» degen jazuları bar sändi plakat düñgirşiktiñ sırtına ilinipti. Oquşılar kiimindegi «Qazaqstanda şığarılğan» deytin japsırma jazular közimizge ottay basıldı.
«Magnum» dükeninde mektep oquşılarına arnalğan «Clasman», «Altinlar», «Marshal», «Fashion», «Koorman», «Sano», t.b. şeteldik firmalardıñ kiim-keşekteri, şwlıqtarı, şaş tüyreuişteri, oqu qwraldarı tömendetilgen bağamen akciya boyınşa satıluda. Mäselen, 13 mıñ teñge twratın er balalardıñ kostyumderi 11 mıñ teñge şamasında bolıp şığadı.
Mektep formasın «Abdi», «Zañ­ğar», «Metro», «Alma», «Ramstor», «Mega», t.b. ülken dükenderden de, köşe bazarlarınan da satıp aluğa boladı.
Bügingi küni ärbir ata-ana balasın mektepke dayındaudıñ qamına şwğıl kirisude.  YAğni kiim-keşek, ayaqkiim, sömke, mektepke qajetti qwral-jabdıqtarı, t.b. kerek-jarağın satıp aluları qajet. Äyteuir, qatardan kem qılmayın dep äurelengendikten mümkindiginşe balasına täuir kiim äperuge tırısadı. Osındayda «oqu oşaqtarında birıñğay mektep formasınıñ bolğanı qajet» deuşiler men «balanı jibere saluğa boladı» deytin ata-analar da tabılatını anıq. Biri «äleumettik jağdayı tömen otbasılardıñ balalarına qiın tüspes üşin birkelki forma kidiru kerek» degendi alğa tartsa, ekinşi jaq, balanıñ talğamın şektemeudi qwptaydı.
Qoğamdağı osınday ekiwday pikirdiñ orın aluına qaramastan, qazir mektepterde lajı bolğanınşa birıñğay kiimderdi kiyu ürdis alğan. Biraq sol birıñğay kiimderdiñ özi är mektepte ärtürli. Mısalı, keybir mekteptiñ şäkirtteri bwrınnan qalıptasqan aq fartuk pen qara köylek kise, endi biri özderine layıqtalıp tiktirilgen birıñğay kiimderimen birden közge tüsedi.
Sonımen, bir balanı mektepke dayındau üşin orta eseppen 40-45 mıñ teñge jwmsaladı eken. Al bir üyden birneşe bala mektepke baratın bolsa, ata-ananıñ qaltasın jwqartatını anıq. Kiimnen basqa oquşılar üşin qanşama suret saluğa arnalğan al'bomdar, torköz, keñ jol, qalıñ däpterler, sızğış, jelim, qalamsaptar, sanağış-esepşottar, boyau qarındaştar, plas­tilinder, eñbek sabağına arnalğan türli-tüsti qağazdar, yağni tolıp jatqan wsaq-tüyek bolsa da asa qajetti oqu qwraldarın alu, äsirese auıldıq jerdegi ata-analardıñ qarjısın ortaytatını sözsiz. Ras, keybir jerlerde äkimdikter, firmalar, demeuşilik jasauğa ıqılastı azamattar  äleumettik jağınan az qamtılğan otbasılarına aqşalay nemese zattay kömek berip te jatadı.
Osı orayda qala dükenderin jaulap alğan şeteldik önimderdiñ ornına otandıq tauarlar köptep jasalsa degen tilegimiz bar. Mektep jasındağı 3 millionğa juıq oquşını birıñ­ğay kiimmen qamtamasız etuge el ekonomikasınıñ qarajatı  tolıq jetedi degen oydamız. Qazaq halqı äu bastan qolönerine, ismerlikke jaqın emes pe edi?! Olay bolsa mektep oquşılarına arnalğan kiim ülgilerin qoljetimdi bağamen nege şığarmasqa?! Osınday igilikti is tayau arada jolğa qoyılar ma eken?

Nwrlan QWMAR

"Ana tili" gazeti

0 pikir