Jwma, 20 Qırküyek 2019
Bizdiñ şeneunik 4573 0 pikir 6 Jeltoqsan, 2014 sağat 18:39

PUTINGE ADAL QIZMET

 

6 jeltoqsan, 2014 jıl. Senbi.

Sağat 11:07.

Astana.

“Habardı” qostım. “Ortalıq kommunikaciyalar qızmetinde” Soltüstik Qazaqstan oblısı äkimi Erik Swltanov esep berip twr eken.

Körşi Resey Federaciyasınıñ memlekettik tilinde söylep jatır. Keyde qazaqşa bir-eki söylemdi qıstıra saladı da, qaytadan körşi eldiñ memlekettik tiline köşe saladı. Şamamen qazaqşası jalpı alğanda bayandamasınıñ köleminen birer payızınan da aspaydı.

Qarsı otırğan BAQ ökilderi öñşeñ qaraközder. Bir jas qızdı orıs pa dep qalıp edim, jaqınnan körsetkende ol da özimiz bolıp şıqtı. Tek qana şaşı aq fotograf kisi özge wlttan bolu mümkin siyaqtı. Jo-joq, swraqtıñ birin ornınan twrıp bir jastau orıs jigiti (tegi ukrain, belorus, nemis, polyak, evrey de bolu mümkin, älbette) berdi... Basqalar jappay qazekeñ.

Jaraydı, soltüstigimizde qara ormannıñ isi müñkip twr delik. Biraq, bwl auılında emes jäne öz jerlesteri arasında emes, Elordamız Astanada, Qazaqstan Respublikasınıñ Ortalıq kommunikaciyalar ortalığında bükil elge taratılatın bayandama jasap twr emes pe?!

Resmi esepti berip twr ğoy!

Nege memlekettik qızmetker memleketke bergen esebin memlekettik tilde jasamaydı? Nege körşi şetel eldiñ memlekettik tilinde söyleydi köbinese?

Sağat 11:47 boldı.

Qırıq minutta qırıq sözin Qazaqstannıñ memlekettik tilinde aytpağan atqaminer kimge esep berip twr sonda, dep, dal boldım?

Qazaq halqına ma, Qazaqstan Prezidentine me? Joq! Joq jäne joq! Erekeñ keşirsin, bwnday sın tek özine ğana emes, bizdiñ joğarı jaqtağı 90 % bastıqtarımızğa tiesili ğoy. Amal neşik, siresip twrğan Astanamızğa kelip solarğa jaqqısı kelgen de şığar, kim bilsin, ol da pende ğoy...

Degenmen, qarapayım swraq qoyayıqşı özimizge de, olarğa da, ağayın:

“Qwrmetti bizdiñ memlekettik joğarı därejeli şeneunikter, sizder kimge jwmıs isteysizder, kimge esep berip twrsızdar, körşi Reseydiñ basşısı Putinge me, bizdiñ memleket basşısı Nwrswltan Nazarbaevqa ma?

Şetel memlekettiñ iegeri orıs halqına ma, özinizdiñ tuğan halqıñız qazaqqa ma? Kimge?

Bwnıñ jauabı bireu-aq.

Qay eldiñ memlekettik tilinde söyleysizder jäne jwmıs isteysizder  –  sol elge!

Bayandamalarıñdı Nazarbaevqa emes  –  Putinge berip twrsızdar!

Qıtayşa sayrasañız  –  Si Dzinpinge!

Francuzşa söyleseñiz, mına däl qazir bizde qonaqta jürgen  –  Fransua Ollandqa!

Orısşa resmi esebiñizdi aytsañız, eş kümän joq  –  Vladimir Putinge...

         Ukrainder de biraz bizdiñ jolımızben jürip, endi qattı opıq jep otır. Esiñ barda eliñdi tap degendi qaşan tüsinedi qazaqtıñ ministri men äkimi?

         Qaşan olar Putinge emes, Nazarbaevqa jwmıs istey bastaydı?

         Qaşan?

 

Wltjan Nığaytarov.

Abay.kz

0 pikir