Düysenbi, 16 Qırküyek 2019
Anıq-qanığı 5589 12 pikir 17 Qaraşa, 2017 sağat 12:33

Sağadievtiñ statistikası keri ketip baradı

Bügin biz Erekeñniñ, Erlan Sağadievtiñ eki mälimdemesi jaylı söz qozğaymız. Atap aytsaq, byudjettiñ, onıñ işinde Wlttıq qordıñ aqşasın 2018-2020 jıldarğa transfertteu jönindegi Mäjilis jiınında deputat Sergey Erşov degen kisi ministr Erlan Sağadievke eskertu jasap, ağılşın kurstarına jwmsalatın qarjınıñ tiimdi igeriluine kümän keltiripti. "Ratel.kz" saytı solay dep jazadı.

"Respublikalıq byudjetten 2018 jılı biliktilikti arttıru, mamandar dayarlau, pänderdi üş tildilikke ötkizuge 6,9 milliard teñge qarastırılğan. Qazirdiñ özinde osınday kurstardan ötken 16,5 mıñ mwğalim himiya, biologiya, fizika, informatika pänderin üş tilde beruge qauqarlı. Al, endi, şağın kurstardan ötken mwğalimder ağılşın tilinde sabaq öte ala ma? Bwl kümändi dünie."

Bwl jañağı deputat Sergey Erşovtıñ Bilim jäne ğılım ministri Erlan Sağadiev mırzağa qarata aytqandarı.

Ilği nöpir sınnıñ töpesinde jüretin bas wstaz Erekeñ, Erlan Kenjeğaliwlı, ağılşın tilinde sabaq berip jatqan mwğalimder turalı resmi derek aytıptı.

"Biz biıl ülken eksperimentti bastadıq. Biılğı jürgizilip jatqan jwmıstardıñ qorıtındısı jıl soñında şığadı. Sonda ketken kem-ketikterdi eskerip, keler jılı ağılşın tiline ötudiñ jaña grafigin äzirleymiz. Ayta keteyik, qazirdiñ özinde 1500 oqıtuşı ağılşın tilinde sabaq bere bastadı".

Bwl Erlan Sağadiev mırzanıñ sözi. Aytılğan uaqıtı: 2017 jıldıñ 16-qaraşası.

Bir qızığı Erekeñ biılğı jıldıñ naurızında däl osı mäselege qatıstı mülde bölek derek aytqan.

"Tipti, biılğı küzdiñ özinde 100-den asa sınıp ağılşın tiline auısadı dep josparlap otırmız. Qazirdiñ özinde elimizdiñ 120 mektebinde 2700 mwğalim ağılşın tilinde sabaq berip jatır".

Bwl da Erekeñniñ sözi. Aytılğan uaqıtı: 2017 jıldıñ 28-naurızı.

Söytip, Erlan Kenjeğaliwlı aytqan 2700 mwğalim aynaldırğan 8 aydıñ işinde eki esege qısqarıp qalğan körinedi. Älde, şatıp-pwtıp jüretin Erekeñniñ kezekti statistikaldan jañılıstı ma? Joq, älde Sağadiev basqaratın ministrlik onsız da ağılşınşa sarnap twrğan 1200 wstazdı ağılşınşa üyrettik dep, Ükimetten tağı aqşa qarpımaq pa? Basqa-basqa emes, bas mwğalimniñ eki söyleui, Sağadiev statistikası keri ketip bara jatuı jaqsılıqtıñ nışanı emes...

Nwrgeldi Äbdiğaniwlı

Abai.kz

12 pikir