Jeksenbi, 24 Mausım 2018
46 - söz 2541 7 pikir 4 Jeltoqsan, 2017 sağat 09:55

Şaytan

Adamnıñ näpsisi küşti bolsa, onımen alısatın şaytan da küşti.
Auılda, äke-şeşemniñ janında jürgende şaytannıñ mende, meniñ şaytanda jwmısım bolğan joq.

Sodan mektepke bardım, bastauış sınıpta şaytan meni adambısıñ demedi. Birte-birte sabaqtan qaşatındı, ötirik auırıp, qosımşa däriske barmaytındı şığardım. Bwl kezderde meni azğırğan şaytannıñ özi emes, özim qatarlı balası bolsa kerek. Sınıptan sınıpqa köşip, toğız-onğa ilikkende bozbala şaytan mağan qızğa baru üşin jaqsı kiimdi aldın-ala sırtqa şığarıp qoyıp, äke-şeşe alañsız şay işip otırğanda sıp ete qaludı üyretti. Körşi-qolañnıñ wrasına nemese qorasına wrlanıp kirip, kartop, tauıq jımqırudı, onı saudagerge bwldap ötkizip, jiın-toyda dastarhandı jaynatıp qoyuğa baulıdı...

Däu qalağa kelip, student atanğanda alaq-jwlaq etken bir jas şaytan top qwrıp, jalğız-jarım adamğa älimjettik jasauğa, tonauğa; käsibine adal emes mwğalimge para berip sabaqqa kelmey-aq qoyuğa; jataqhanada soñğı nanın ünemdep jep otırğan qızdardıñ balkondağı näpaqasın üp dep ketuge bolatınına köz jetkizdi. Sol studenttik şaqta twnığı laylanbağan balğınnıñ qwşağına lıpasız qwlap bara jatqanda tösektiñ basında qol şapalaqtap bozbala şaytan men boyjetken şaytan otırğanın anıq körgen kez de bolğan.

Özimmen birge ösip kele jatqan şaytan eseygenniñ bir belgisi dep, qolıma temeki wstattı. «Qızdar işip otırğanda sen nesine tejelesiñ» dep, işimdik alıp berdi. «Bwl da dünieniñ bir rahatı. Dämin kör» dep, şöp şekkizdi, kal'yan wstattı. Bilekke ine salğızdı. Osı birdeñe biletin şığar dep, eş qarsılıqsız, «Osınıñ soñı qalay bolar eken?» degen eş oysız ilese berdim.

Birte-birte ısıldım. Adamdardıñ senimine kirip, qomaqtı aqşa aludı, baspanasın, köligin kepilge qoyğızıp nemese nesie alğızıp, tayıp twratındı şığardım. Bir dosım tau jaqtağı asa qımbat üyin satıp, ülken saudağa salğalı jürgende üy-işimen ana düniege jiberip, bar aqşanı üp dep kettim.

Halıqtı aldap, deputat boldım. Eldiñ auzınan jırıp, şikizattı sırtqa jiberuge, jerdi satuğa, narazılıq bildirgenderge oq atuğa qarsı emespin dep qol köterip qoyıp, ol jaqta da biraz otırdım.

Äbden şarıqtau şegime jetkenim sonşa, altı jasar büldirşindi büldirdim. Mine, osı kezde bayağı özim qatarlı şaytan meni eñ ülken şaytanğa alıp keldi. Ol mağan wzaq qarap otırıp, düniege kelgende alğaş jasağan qateligimnen, künämnen bastap saraladı da, «Adamnıñ näpsisi küşti bolsa, onımen alısatın şaytan da küşti boladı. Al, bwğan endi eşqanday şaytannıñ keregi joq!» dedi. Dedi de, meni iterip şığarıp jiberdi...

Qanağat Äbilqayır

Facebook-tegi paraqşasınan

7 pikir