Düysenbi, 23 Qırküyek 2019
Bizdiñ şeneunik 3368 10 pikir 30 Qañtar, 2018 sağat 14:23

Baqauovtıñ büyregi qaşan qazaqqa bwradı?

Soltüstiktegi oblıstar jaylı az jazılıp jürgen joq. Täuelsizdik alğalı beri otız jılğa tayasa da, orıstanğan ölkemizdi qazaqılandıruğa şamamız jetpey jatır. Oğan bastı sebep ne? Bizdiñ oyımızşa, soltüstikke basşı bolıp barğan azamattardıñ batıldığınıñ joqtığı. Mısalğa, bir ğana Pavlodar oblısın alayıqşı. Qazaqtıñ "men" degen marğasqaların tuğızğan Kereku öñirinde Bolat Baqauov ne istey aldı? Aytqan sözi men isi bir-birine üylesti me? Baqauov basşı bolğalı osı oblısta qanday özgeris boldı?

Pavlodardıñ äkimi Bolat Boqauovtı bizdiñ portal az sınağan joq. "Baqauov memlekettik tildi qorğamağanı üşin tarihta qaladı" dep soltüstiktegi memlekettik tildiñ jayın qozğap, maqala jazğanımızda Bökeñ "Pavlodardağı bar balabaqşanı qazaq balabaqşası etemin" dep qoyıp qalğan edi. Äl-äzir Baqauov balabaqşanı bılay qoyıp, jay ğana köşe attarın özgertuge şaması jetpey jatır.

Baqauov balabaqşalardı qazaq tiline köşirem dep eldiñ aldında ayttı. Endi nege sol aytqanın orındamay otır? Qazir är qazaq Pavlodar degen qalanıñ atın qazaqşa atauğa dayın. Biraq, resmi biliktiñ, yağni Baqauov bastağan şendilerdiñ jer-su attarına kelgende ayağın añdıp basıp, şeşimdi qadam jasay almay otırğanı nelikten? Bolat Baqauovtıñ özi bastamaşı bolıp, "Ruhani jañğıru" bağdarlaması ayasında qalanıñ atın qazaqılandırıp jiberse, Elbasığa körsetken qwrmeti bolmas pa edi.

Qalanıñ atın bılay qoyıp, Baqauovtıñ komandası wsaq-tüyek jer atauların auıstıru mäselesine de bilek sıbana kirise almay otır. HİH ğasırdıñ ayağı men HH ğasırdıñ basında Stolıpinniñ agrarlıq reforması jıldarı Reseyden, Ukrainadan qonıs audaru bwqaralıq sipat alğanı belgili. Sonıñ nätijesinde, HH ğasırdıñ basında Pavlodar uezinde 220-dan astam qonıs audaruşılardıñ seloları salındı. Imperator Romanovtar äuletine baylanıstı: Romanovka, Nikolaevka, Alekseevka, Elenovka, Irinovka, Tat'yanovka, Borisovka, Ol'gina, Nataşina, Pavlodar (Pavelğa sıylıq) tärizdi patşa ükimetiniñ belgisin bildiretin barlığı 605 toponim qalıptastı.

Sol 605 toponimdi şetinen auıstırıp, qazaqılandıruğa Bolat Baqauov kirispese, kim kirispek?

Biz, qalıñ qazaq Bolattan ümit kütemiz. Al, ol bolsa, jiındarda qazaq tilinde söyleudi ar sanaydı. Tidim-qaştım memlekettik tilde amandasıp alıp, barlıq oyın orısşa jetkizedi. Onday adam oblıstı qalay qazaqılandırsın! Tipti, bıltır äruaqtarğa qwran bağıştauğa qarsı bolğanın bükil el wmıta qoyğan joq. Naurız merekesin kün suıq dep toylatpay tastamaq bolğan da osı äkim. Osı bir olqılıqtardı joyu üşin Bökeñ bıltırğı sözinde twrıp, balabaqşalardı qazaqşa söyletip jiberse degen nietimiz bar.

Äy, qaydam! "Baqauovtıñ büyregi qaşan qazaqqa bwradı?" deumen eldiñ şıdamı tausılar boldı.

Äli Kemelov

Abai.kz

10 pikir