Beysenbi, 16 Tamız 2018
46 - söz 1002 8 pikir 11 Şilde, 2018 sağat 13:43

Ş.Qwdayberdiwlı hat!

(tuğan künine oray oytolğau)

Ardaqtı Şäkärim ata!

Bügin, tap osı küni siz 160 jasqa tolıpsız! Kim toylap jatır, qayda toylap jatır, toylap jatır ma özi – onı men ayta almaymın! Biletinim – jarıq düniede bar keziñizde jarıtıp jaqsılıq köre almağanıñız! Ras, jastay äkeden ayrılıp, wlı Abayday danagöydiñ tärbiesinde boldıñız, aqıl-keñesin tıñdap, öner degen qasietti köşke ilestiñiz!

Siz bayağı ğwlama babalarıñız – Äbunasır Äl-Farabi, Abız Ahmet Iassaui ötken sara jolğa soqpaq salıp, köp til biluge talpındıñız, sosın da arab, parsı,türik, tipti orıs tilderine de jetik bolıp qalıptastıñız. Siz ğalımdıq joldı da asa qadirlep, ğılımi eñbekter tüzuge barınşa beldi bekem buıp, şejire kitabın, mwsılman şartı tolğamın düniege äkeldiñiz. Bwl ğana ma, joq, siz wlt poeziyasına da ölşeusiz üles qosıp, «Qalqaman-Mamır», «Eñlik-Kebek», t.b. dastandardı tudırdıñız. Al, bwdan da bölektep, erekşe mañız bere aytarlığı – Siz orıs oyınıñ alıbı, körkem ädebiettiñ asqar şıñı Lev Tolstoymen terezesi teñ kisidey tildesip, hat jazıstıñız, bwnı ekiniñ biri istey alar ma? Qısqası, Şäkärim atay (siz menen jüz jas ülkensiz, ata demeske bolar ma), qazaq degen halıqqa osınşama wlı mwra jasap, ölşeusiz eñbek siñirip kele jatsañız da, ötken ğasırdıñ otızınşı jıldarındağı ılañ kezeñ sizdiñ qadiriñizge jetken joq!

Sizdi oy deñgeyi kindiginen de tömen bir topas (bälkim, bireu emes, birneşeu) mıltıq kezedi de, attı da tastadı! Oy, Täñir atqır-ay! Oy, jetesiz-ay! Sizdey oy alıbına qalay ğana qol köterdi eken? Äy, biraq, ömirinde sizdiñ biikke köterilip körmegen tasmañdayğa nege olay ettiñ deudiñ özi aqımaqşılıq! Jetesiz ğoy, jetesizge ne etesiz?

Atajan, siz büginde egemen elimizben birge jas wrpaq jadında jattalıp, atağıñız aspandap twrğanın bilmeysiz-au! Älde, bilip jatır ma ekensiz? Qalay desek te, är istiñ artın dwrıstağan jaqsı-aq, soñınıñ qayırın bersin deytini sodan ba eken! Sizge endi eşteñeniñ de keregi joq, bügingi wrpağıñızğa jüz alpıs jastıñ biiginen köz sala qarap twrsız. Biraq, biz sizdi izdeymiz, sizdey oy alıptarın sağına añsaymız!

Sizder nege... sonşama azsızsızdar? Nege tım sirek tuasızdar? Sizge qwttıqtau sözimdi arnay otırıp, osı joldardı sonşalıq qamığıp jazıp otırğanım da ras! Mına qamığıñqılau halqıñdı ölmes ruhıñmen, könermes parasat-payımıñmen demey berşi, Tolstoy biigindegi oyşıl Twlğa!

Joltay Jwmat-Älmeşwlınıñ Facebook-tegi paraqşasınan

Abai.kz

8 pikir