ش.قۇدايبەردىۇلى حات!
(تۋعان كۇنىنە وراي ويتولعاۋ)
ارداقتى شاكارىم اتا!
بۇگىن، تاپ وسى كۇنى ءسىز 160 جاسقا تولىپسىز! كىم تويلاپ جاتىر، قايدا تويلاپ جاتىر، تويلاپ جاتىر ما ءوزى – ونى مەن ايتا المايمىن! بىلەتىنىم – جارىق دۇنيەدە بار كەزىڭىزدە جارىتىپ جاقسىلىق كورە الماعانىڭىز! راس، جاستاي اكەدەن ايرىلىپ، ۇلى ابايداي داناگويدىڭ تاربيەسىندە بولدىڭىز، اقىل-كەڭەسىن تىڭداپ، ونەر دەگەن قاسيەتتى كوشكە ىلەستىڭىز!
ءسىز باياعى عۇلاما بابالارىڭىز – ءابۋناسىر ءال-فارابي، ابىز احمەت ياسساۋي وتكەن سارا جولعا سوقپاق سالىپ، كوپ ءتىل بىلۋگە تالپىندىڭىز، سوسىن دا اراب، پارسى،تۇرىك، ءتىپتى ورىس تىلدەرىنە دە جەتىك بولىپ قالىپتاستىڭىز. ءسىز عالىمدىق جولدى دا اسا قادىرلەپ، عىلىمي ەڭبەكتەر تۇزۋگە بارىنشا بەلدى بەكەم بۋىپ، شەجىرە كىتابىن، مۇسىلمان شارتى تولعامىن دۇنيەگە اكەلدىڭىز. بۇل عانا ما، جوق، ءسىز ۇلت پوەزياسىنا دا ولشەۋسىز ۇلەس قوسىپ، «قالقامان-مامىر»، «ەڭلىك-كەبەك»، ت.ب. داستانداردى تۋدىردىڭىز. ال، بۇدان دا بولەكتەپ، ەرەكشە ماڭىز بەرە ايتارلىعى – ءسىز ورىس ويىنىڭ الىبى، كوركەم ادەبيەتتىڭ اسقار شىڭى لەۆ تولستويمەن تەرەزەسى تەڭ كىسىدەي تىلدەسىپ، حات جازىستىڭىز، بۇنى ەكىنىڭ ءبىرى ىستەي الار ما؟ قىسقاسى، شاكارىم اتاي ء(سىز مەنەن ءجۇز جاس ۇلكەنسىز، اتا دەمەسكە بولار ما), قازاق دەگەن حالىققا وسىنشاما ۇلى مۇرا جاساپ، ولشەۋسىز ەڭبەك ءسىڭىرىپ كەلە جاتساڭىز دا، وتكەن عاسىردىڭ وتىزىنشى جىلدارىنداعى ىلاڭ كەزەڭ ءسىزدىڭ قادىرىڭىزگە جەتكەن جوق!
ءسىزدى وي دەڭگەيى كىندىگىنەن دە تومەن ءبىر توپاس (بالكىم، بىرەۋ ەمەس، بىرنەشەۋ) مىلتىق كەزەدى دە، اتتى دا تاستادى! وي، ءتاڭىر اتقىر-اي! وي، جەتەسىز-اي! سىزدەي وي الىبىنا قالاي عانا قول كوتەردى ەكەن؟ ءاي، بىراق، ومىرىندە ءسىزدىڭ بيىككە كوتەرىلىپ كورمەگەن تاسماڭدايعا نەگە ولاي ەتتىڭ دەۋدىڭ ءوزى اقىماقشىلىق! جەتەسىز عوي، جەتەسىزگە نە ەتەسىز؟
اتاجان، ءسىز بۇگىندە ەگەمەن ەلىمىزبەن بىرگە جاس ۇرپاق جادىندا جاتتالىپ، اتاعىڭىز اسپانداپ تۇرعانىن بىلمەيسىز-اۋ! الدە، ءبىلىپ جاتىر ما ەكەنسىز؟ قالاي دەسەك تە، ءار ءىستىڭ ارتىن دۇرىستاعان جاقسى-اق، سوڭىنىڭ قايىرىن بەرسىن دەيتىنى سودان با ەكەن! سىزگە ەندى ەشتەڭەنىڭ دە كەرەگى جوق، بۇگىنگى ۇرپاعىڭىزعا ءجۇز الپىس جاستىڭ بيىگىنەن كوز سالا قاراپ تۇرسىز. بىراق، ءبىز ءسىزدى ىزدەيمىز، سىزدەي وي الىپتارىن ساعىنا اڭسايمىز!
سىزدەر نەگە... سونشاما ازسىزسىزدار؟ نەگە تىم سيرەك تۋاسىزدار؟ سىزگە قۇتتىقتاۋ ءسوزىمدى ارناي وتىرىپ، وسى جولداردى سونشالىق قامىعىپ جازىپ وتىرعانىم دا راس! مىنا قامىعىڭقىلاۋ حالقىڭدى ولمەس رۋحىڭمەن، كونەرمەس پاراسات-پايىمىڭمەن دەمەي بەرشى، تولستوي بيىگىندەگى ويشىل تۇلعا!
جولتاي جۇمات-المەشۇلىنىڭ Facebook-تەگى پاراقشاسىنان
Abai.kz
