Düysenbi, 16 Qırküyek 2019
Sañlaq 1405 0 pikir 16 Qazan, 2018 sağat 23:43

Qazaqstan - Andorra: Stoilov jau ketken soñ qılışın qayradı

Bügin Qazaqstan wlttıq qwraması UEFA Wlttar Ligası ayasında Andorra futbolşıların qabıldadı.

Europa futbol qauımdastığınıñ jaña jobası «Wlttar ligası» turniri Qazaqstan futbolşıların jatırqay qabıldadı. Alğaşqı üş matç boyı jeñiske jete almağan bizdiñ qwrama bügin bar aşuın alaqanday Andorradan aldı. Osınıñ aldında öz alañında Gruziyadan 0:2 esebimen jeñilip, qonaqta Andorra jäne Latviyamen tek tarqasqan (1:1) Qazaqstan qwraması törtinşi oyında 4:0 esebimen jeñiske jetti.

Osınıñ aldındağı oyındarda elimizdegi eñ maqtaulı degen futbolşılardı alañğa şığarsa da eş nätije bolmağan soñ bas bapker bügin birqanşa jas qırannıñ tomağasın tarttı. Stanimir Stoilov dwrıs joldı endi tapqan eken, auır qimıldaytın Aleksey Şetkinnen qwtılğan Qazaqstan qwramasınıñ şabuıl şebi tülep sala berdi. Negizgi qwramda birinşi ret şıqqan Erkebwlan Seydahmet pen Bauırjan Twrısbek mergendigimen közge tüsti. Bwdan bölek, kapitandıq mindetin qaytarıp alğan Bauırjan Islamhan da bauırın jaza şaptı.

Jeñiske jetken jaqsı ärine. Biraq, 80 mıñ ğana halqı bar şağın eldiñ qwramasın jeñgenimiz üşin börkimizdi aspanğa atıp quanudıñ jöni kelmey twr. Sebebi, bwl turnirden bizdiñ kütkenimiz basqa bolatın. Öz tobımızda birinşi orın alıp, 2020 jılğı Europa çempionatına beriler joldamağa talasıp köru edi. Alayda, toptağı bastı qarsılasımız Gruziyadan baqanday jeti wpay qalıp qoyğan bizdiñ quanuğa eş mümkindigimiz joq

Ekinşiden, bügingi qarsılasımız Andorra qwramasınıñ futbolşıları bizdiñ eldegidey milliondap jalaqı almaydı.Tipti arasında jartılay käsibi futbolşılar da bar. Al elimiz futbolşılarınıñ jağdayı qanday ekeni bärimizge belgili. Qarapayım halqı qoñırqalta kün keşetin Qazaqstannıñ futbolşıları aqşanı kürep tabadı. Elimizde dop qualağandarğa tölenetin jalaqı özimiz qatarlı damuşı elderdiñ bärinen joğarı. Beyresmi derekterge süyensek, qwramanıñ bas bapkeri Stoilov mırza qazaq futbolşılarına qalay dop tebudi üyretkeni üşin jılına 2 mln euro jalaqı alatın körinedi.

Sonımen Qazaqstan qwraması Wlttar ligasındağı alğaşqı jeñisine qol jetkizdi. Biraq, bolgariyalıq maman bastağan bizdiñ futbolşılar säl keş qimıldağan sekildi. Biz jığılıp-sürinip jürgende Gruziya qwraması alğaşqı üş oyında da jeñiske jetip, bizden bwrın märege jaqındap qaldı. Endi bizge öz tobımızda köş bastau üşin qalğan eki oyında jeñiske jetu jetkiliksiz. Ol üşin oq boyı wzap ketken gruzinderdiñ soñğı üş matçta da sürinuin tilep, mısıq tileu bolıp otıramız (bir oyın bizge qarsı).

Wlttar Ligası. D divizionı. 1 top

Qazaqstan - Andorra 4:0 (2:0)

Goldar: Seydahmet 21, Twrısbek 39, Jozep Gomes 61 (ag), Mwrtazaev 74

Qazaqstan: Nenad Eriç (Q) - Ğafurjan Süyimbaev, Evgeniy Postnikov, YUriy Logvinenko, Abzal Beysebekov, Georgiy Jukov, Bauırjan Islamhan (K), Serikjan Mujikov, Baktier Zaynutdinov, Erkebwlan Seydahmet, Bauırjan Twrısbek.

Andorra: Jozep Gomes (Q) - Çus Rubio, Il'defons Lima (K), Maks L'overa, Moyses San-Nikolas - Mark Rebes, Mark Vales, Viktor Rodriges, Joan Cervos - Mark Puhol', Jordi Alaes.

Quanış Qappas

Abai.kz

0 pikir