Särsenbi, 26 Mausım 2019
Qwyılsın köşiñ 5294 7 pikir 9 Qañtar, 2019 sağat 15:04

Qandastarımızdıñ zeynetaqı mäselesi oñ şeşimin taptı

Qwrmetti Mädina Erasılqızı!

Sizdi ötken Täuelsizdik küni jäne Jaña jıl merekesimen şın jürekten quattıqtaymın!

Bügin Sizge zor rahmet aytudıñ reti kelip twr.

Köşi-qon – Wlt Köşbasşısı Nwrswltan Nazarbaevtıñ Qazaqstan Täuelsizdigin jariyalaudan bwrın jolğa qoyğan TWÑĞIŞ häm WLI sayasatı. Nwrswltan Äbişwlınıñ kemeñger twlğa, köregen basşı ekenin törtkül düniege birden tanıtqan da – osı alısta jürgen ağayındı Atajwrtqa şaqıru turalı şığarğan BATIL äri TARIHI şeşimi!

Wlt Köşbasşısı Nwrswltan Nazarbaevtıñ köregendikpen Qazaqstan Täuelsizdigin jariyalaudan bir ay bwrın, naqtılap aytsaq, 1991 jılğı 18 qaraşada Qazaq KSR Ministrler Keñesine «Basqa respublikalardan jäne şetelderden selolıq jerlerde jwmıs isteuge tilek bildiruşi bayırğı wlt adamdarın Qazaq KSR-inde qonıstandıru tärtibi men şarttarı turalı» arnayı №711 Qaulı şığartqan 28 jıldan beri şeşilmey kele jatqan bir mäsele bar edi. Ol – Mañğoliya men Qıtaydan oralğan qandastarımızdıñ zeynetaqı mäselesi bolatın.

Sol bir qiın tüyindi şeşu, alıstan oralğan ata-apalardı quantu sındı asa sauaptı jwmıs Sizdiñ ministr boluıñızdı kütip twr eken. Mine, Eñbek jäne halıqtı äleumettik qorğau ministrligine basşı bolıp Siz keldiñiz de sol missiyanı abıroymen orındap, alıstan oralğan ağayınnıñ alğısına bölenip otırsız bügin.

«Qazaqstan Respublikasında zeynetaqımen qamsızdandıru turalı» Zañınıñ «Jasına baylanıstı zeynetaqı tölemderin tağayındau üşin eñbek ötilin esepteu» degen 13-babına «Qazaqstan Respublikasına tarihi otanında twraqtı twru maqsatında kelgen etnostıq qazaqtardıñ şığu elindegi eñbek qızmeti» degen jaña tarmaq qostırdıñız.

Esiñizde bolsa, ötken jılı 14 naurızda «Nwr Otan» partiyasınıñ Respublikalıq qoğamdıq qabıldau bölmesinde azamattardı qabıldağan keziñizde Qıtaydan kelgen Mälik Bayanbay, Käkimbay Äbdahan qatarlı jeti aqsaqal qabıldauğa kirip, zeynetaqıların köbeytip berudi ötinip, kezdesu soñında Sizge aq batasın berip edi ğoy. Al, bügin Sizge zeynet jasındağı jäne zeynetke şığudıñ kezeginde twrğan barşa qandastarıñız aq tilegi men jürekjardı alğısın jaudıruda.

Elbasınıñ Köşi-qon sayasatınıñ qoldauşısı, alıstan oralğan ağayınnıñ qwqığın qoğap jürgen azamat retinde öz atımnan Sizge şeksiz alğıs aytam. Köşi-qon sayasatına tıñ reformalar kerek ekenin Öziñizge qwlaq qağıs etkenim esimde. Äsirese, köşip keluşiler men qonıs audaruşılardı qonıstandıru üşin Ükimet ayqındağan arnay öñirler qonıstanğısı keletin otbasılar üşin.  Qazirgi tañda sol reformalardı qolğa ala bastağanıñızdan da habardarmın jäne jwrt süyinetin nätije şığaratınıñızğa senem. Sizdi belsene qoldauğa dayınmın!

Barşa qızmetiñizge tabıs, bereke jäne jeñis tileymin!

Zor qwrmetpen,

Auıt MWQIBEK

Aqın, Qazaq köşiniñ janaşırı,
«Nwr Otan» partiyası
Respublikalıq qabıldau
bölimesiniñ keñesşisi

Abai.kz

7 pikir