قۇرمەتتى ءمادينا ەراسىلقىزى!

ءسىزدى وتكەن تاۋەلسىزدىك كۇنى جانە جاڭا جىل مەرەكەسىمەن شىن جۇرەكتەن قۋاتتىقتايمىن!

بۇگىن سىزگە زور راحمەت ايتۋدىڭ رەتى كەلىپ تۇر.

كوشى-قون – ۇلت كوشباسشىسى نۇرسۇلتان نازارباەۆتىڭ قازاقستان تاۋەلسىزدىگىن جاريالاۋدان بۇرىن جولعا قويعان تۇڭعىش ءھام ۇلى ساياساتى. نۇرسۇلتان ءابىشۇلىنىڭ كەمەڭگەر تۇلعا، كورەگەن باسشى ەكەنىن تورتكۇل دۇنيەگە بىردەن تانىتقان دا – وسى الىستا جۇرگەن اعايىندى اتاجۇرتقا شاقىرۋ تۋرالى شىعارعان باتىل ءارى تاريحي شەشىمى!

ۇلت كوشباسشىسى نۇرسۇلتان نازارباەۆتىڭ كورەگەندىكپەن قازاقستان تاۋەلسىزدىگىن جاريالاۋدان ءبىر اي بۇرىن، ناقتىلاپ ايتساق، 1991 جىلعى 18 قاراشادا قازاق كسر مينيسترلەر كەڭەسىنە «باسقا رەسپۋبليكالاردان جانە شەتەلدەردەن سەلولىق جەرلەردە جۇمىس ىستەۋگە تىلەك ءبىلدىرۋشى بايىرعى ۇلت ادامدارىن قازاق كسر-ىندە قونىستاندىرۋ ءتارتىبى مەن شارتتارى تۋرالى» ارنايى №711 قاۋلى شىعارتقان 28 جىلدان بەرى شەشىلمەي كەلە جاتقان ءبىر ماسەلە بار ەدى. ول – ماڭعوليا مەن قىتايدان ورالعان قانداستارىمىزدىڭ زەينەتاقى ماسەلەسى بولاتىن.

سول ءبىر قيىن ءتۇيىندى شەشۋ، الىستان ورالعان اتا-اپالاردى قۋانتۋ سىندى اسا ساۋاپتى جۇمىس ءسىزدىڭ مينيستر بولۋىڭىزدى كۇتىپ تۇر ەكەن. مىنە، ەڭبەك جانە حالىقتى الەۋمەتتىك قورعاۋ مينيسترلىگىنە باسشى بولىپ ءسىز كەلدىڭىز دە سول ميسسيانى ابىرويمەن ورىنداپ، الىستان ورالعان اعايىننىڭ العىسىنا بولەنىپ وتىرسىز بۇگىن.

«قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭىنىڭ «جاسىنا بايلانىستى زەينەتاقى تولەمدەرىن تاعايىنداۋ ءۇشiن ەڭبەك ءوتىلىن ەسەپتەۋ» دەگەن 13-بابىنا «قازاقستان رەسپۋبليكاسىنا تاريحي وتانىندا تۇراقتى تۇرۋ ماقساتىندا كەلگەن ەتنوستىق قازاقتاردىڭ شىعۋ ەلىندەگى ەڭبەك قىزمەتى» دەگەن جاڭا تارماق قوستىردىڭىز.

ەسىڭىزدە بولسا، وتكەن جىلى 14 ناۋرىزدا «نۇر وتان» پارتياسىنىڭ رەسپۋبليكالىق قوعامدىق قابىلداۋ بولمەسىندە ازاماتتاردى قابىلداعان كەزىڭىزدە قىتايدان كەلگەن مالىك بايانباي، كاكىمباي ءابداحان قاتارلى جەتى اقساقال قابىلداۋعا كىرىپ، زەينەتاقىلارىن كوبەيتىپ بەرۋدى ءوتىنىپ، كەزدەسۋ سوڭىندا سىزگە اق باتاسىن بەرىپ ەدى عوي. ال، بۇگىن سىزگە زەينەت جاسىنداعى جانە زەينەتكە شىعۋدىڭ كەزەگىندە تۇرعان بارشا قانداستارىڭىز اق تىلەگى مەن جۇرەكجاردى العىسىن جاۋدىرۋدا.

ەلباسىنىڭ كوشى-قون ساياساتىنىڭ قولداۋشىسى، الىستان ورالعان اعايىننىڭ قۇقىعىن قوعاپ جۇرگەن ازامات رەتىندە ءوز اتىمنان سىزگە شەكسىز العىس ايتام. كوشى-قون ساياساتىنا تىڭ رەفورمالار كەرەك ەكەنىن وزىڭىزگە قۇلاق قاعىس ەتكەنىم ەسىمدە. اسىرەسە، كوشىپ كەلۋشىلەر مەن قونىس اۋدارۋشىلاردى قونىستاندىرۋ ءۇشىن ۇكىمەت ايقىنداعان ارناي وڭىرلەر قونىستانعىسى كەلەتىن وتباسىلار ءۇشىن.  قازىرگى تاڭدا سول رەفورمالاردى قولعا الا باستاعانىڭىزدان دا حاباردارمىن جانە جۇرت سۇيىنەتىن ناتيجە شىعاراتىنىڭىزعا سەنەم. ءسىزدى بەلسەنە قولداۋعا دايىنمىن!

بارشا قىزمەتىڭىزگە تابىس، بەرەكە جانە جەڭىس تىلەيمىن!

زور قۇرمەتپەن،

اۋىت مۇقيبەك

اقىن، قازاق كوشىنىڭ جاناشىرى،
«نۇر وتان» پارتياسى
رەسپۋبليكالىق قابىلداۋ
بولىمەسىنىڭ كەڭەسشىسى

Abai.kz