Düysenbi, 23 Qırküyek 2019
46 - söz 1983 9 pikir 14 Qañtar, 2019 sağat 13:44

Azamattı qadirleu wğımı joğalıp baradı

Bayağıda auılda jürgende şeşelerimizdiñ auzınan «Er-azamattıñ betinen alğan qatınnıñ jolı bolmaydı» degendi jii estitinmin. Bala bolğandıqtan ba, ol kezderi osı sözdiñ astarına asa qattı köñil bölgen joqpın. Män bermek tügil, sovet sayasatı äyel teñdigin künde qaqsap jatqan uaqıtta qayran şeşelerimizdiñ aytqan aqıldarı meniñ közime eskiliktiñ köleñkesinde qalıp qoyğan uağızday bolıp elesteytin.

Bir ğajabı, sovettik tärbieniñ ığına jığılmağan aq jaulıqtı analarımız özderi ğana sıylap qoymay, küyeulerin sıylaudı bizden de talap etetin. «Kökeleriñ kele jatır» degen olardıñ bir auız sözi biz siyaqtı auıldıñ qara domalaqtarına «Äkim kele jatır» degennen kem äser etpeytin. Oyınımızdı birden doğarıp, kökelerimiz şäyin işip bolğanşa, ünimizdi şığarmaytınbız. Üydiñ tätti tağamdarı eñ aldımen jwmıstan şarşap-şaldığıp kelgen azamattıñ aldına qoyılatın, olardan keyin ğana barıp biz dastarhanğa qol sozatınbız (Bügin bäri kerisinşe. Jaqsınıñ bärin äueli balalarımızdıñ auzına tosatın boldıq. Oylanıp köreyikşi, bügingi wrpaqtıñ «egoist» bolıp bara jatqanına eñ aldımen özimiz kinäli emespiz be, osı. 

Er-azamattıñ betinen almaq tügil, onıñ aldın kesip ötudiñ özi bayağıda ülken körgensizdik bolıp sanalatın.
Äli esimde. Äjeme erip Aqşığannaqqa barğanımda, auıl kempirleri jasım äli jetige de tolmay, jerden tayaq jep jürgen meni «Sen erteñ bir şañıraqtıñ azamatı bolatın erkeksiñ» dep törge şığaratın. 

Ökinişke qaray, bügingi tañda bizdiñ qoğamda bir kezderi şeşelerimiz qadir twtıp qasterlegen erkektiñ «kul'ti» joyılıp, azamattı qadirleu wğımı atımen joğalıp baradı. Keyde bastıq bolıp dandaysıp ketken äyelderdiñ, tipti, onıñ is-äreketi dwrıs bolmağan künniñ özinde, qaramağındağı isteytin azamatqa zekip jatqanın körgenimde mına jalğannan tüñilip kete jazdaymın. Soñğı kezderi tapa-tal tüste, balasınıñ közinşe küyeuin jerden alıp, jerden salıp wrsa beretin äyelderdi köşeden jii körip qalatın bolıp jürmin.

Osınday keleñsizdikterden keyin äyelder qauımınıñ «qoğamda erkek qalğan joq» dep nalitının tüsine almaymın. Jwmısta äyel bastığınan söz estip, üyinde qatın bastığınan wrıs estip jürgen jigitterdiñ boyında erkekke tän minezdiñ jwğını qaluı mümkin be?

Amangeldi Keñşilikwlınıñ facebook paraqşasınan

Abai.kz

9 pikir