باياعىدا اۋىلدا جۇرگەندە شەشەلەرىمىزدىڭ اۋزىنان «ەر-ازاماتتىڭ بەتىنەن العان قاتىننىڭ جولى بولمايدى» دەگەندى ءجيى ەستيتىنمىن. بالا بولعاندىقتان با، ول كەزدەرى وسى ءسوزدىڭ استارىنا اسا قاتتى كوڭىل بولگەن جوقپىن. ءمان بەرمەك تۇگىل، سوۆەت ساياساتى ايەل تەڭدىگىن كۇندە قاقساپ جاتقان ۋاقىتتا قايران شەشەلەرىمىزدىڭ ايتقان اقىلدارى مەنىڭ كوزىمە ەسكىلىكتىڭ كولەڭكەسىندە قالىپ قويعان ۋاعىزداي بولىپ ەلەستەيتىن.

ءبىر عاجابى، سوۆەتتىك تاربيەنىڭ ىعىنا جىعىلماعان اق جاۋلىقتى انالارىمىز وزدەرى عانا سىيلاپ قويماي، كۇيەۋلەرىن سىيلاۋدى بىزدەن دە تالاپ ەتەتىن. «كوكەلەرىڭ كەلە جاتىر» دەگەن ولاردىڭ ءبىر اۋىز ءسوزى ءبىز سياقتى اۋىلدىڭ قارا دومالاقتارىنا «اكىم كەلە جاتىر» دەگەننەن كەم اسەر ەتپەيتىن. ويىنىمىزدى بىردەن دوعارىپ، كوكەلەرىمىز ءشايىن ءىشىپ بولعانشا، ءۇنىمىزدى شىعارمايتىنبىز. ءۇيدىڭ ءتاتتى تاعامدارى ەڭ الدىمەن جۇمىستان شارشاپ-شالدىعىپ كەلگەن ازاماتتىڭ الدىنا قويىلاتىن، ولاردان كەيىن عانا بارىپ ءبىز داستارحانعا قول سوزاتىنبىز (بۇگىن ءبارى كەرىسىنشە. جاقسىنىڭ ءبارىن اۋەلى بالالارىمىزدىڭ اۋزىنا توساتىن بولدىق. ويلانىپ كورەيىكشى، بۇگىنگى ۇرپاقتىڭ «ەگويست» بولىپ بارا جاتقانىنا ەڭ الدىمەن ءوزىمىز كىنالى ەمەسپىز بە، وسى. 

ەر-ازاماتتىڭ بەتىنەن الماق تۇگىل، ونىڭ الدىن كەسىپ ءوتۋدىڭ ءوزى باياعىدا ۇلكەن كورگەنسىزدىك بولىپ سانالاتىن.
ءالى ەسىمدە. اجەمە ەرىپ اقشىعانناققا بارعانىمدا، اۋىل كەمپىرلەرى جاسىم ءالى جەتىگە دە تولماي، جەردەن تاياق جەپ جۇرگەن مەنى «سەن ەرتەڭ ءبىر شاڭىراقتىڭ ازاماتى بولاتىن ەركەكسىڭ» دەپ تورگە شىعاراتىن. 

وكىنىشكە قاراي، بۇگىنگى تاڭدا ءبىزدىڭ قوعامدا ءبىر كەزدەرى شەشەلەرىمىز قادىر تۇتىپ قاستەرلەگەن ەركەكتىڭ «كۋلتى» جويىلىپ، ازاماتتى قادىرلەۋ ۇعىمى اتىمەن جوعالىپ بارادى. كەيدە باستىق بولىپ داندايسىپ كەتكەن ايەلدەردىڭ، ءتىپتى، ونىڭ ءىس-ارەكەتى دۇرىس بولماعان كۇننىڭ وزىندە، قاراماعىنداعى ىستەيتىن ازاماتقا زەكىپ جاتقانىن كورگەنىمدە مىنا جالعاننان ءتۇڭىلىپ كەتە جازدايمىن. سوڭعى كەزدەرى تاپا-تال تۇستە، بالاسىنىڭ كوزىنشە كۇيەۋىن جەردەن الىپ، جەردەن سالىپ ۇرسا بەرەتىن ايەلدەردى كوشەدەن ءجيى كورىپ قالاتىن بولىپ ءجۇرمىن.

وسىنداي كەلەڭسىزدىكتەردەن كەيىن ايەلدەر قاۋىمىنىڭ «قوعامدا ەركەك قالعان جوق» دەپ ناليتىنىن تۇسىنە المايمىن. جۇمىستا ايەل باستىعىنان ءسوز ەستىپ، ۇيىندە قاتىن باستىعىنان ۇرىس ەستىپ جۇرگەن جىگىتتەردىڭ بويىندا ەركەككە ءتان مىنەزدىڭ جۇعىنى قالۋى مۇمكىن بە؟

امانگەلدى كەڭشىلىكۇلىنىڭ facebook پاراقشاسىنان

Abai.kz