Düysenbi, 25 Naurız 2019
761 4 pikir 7 Aqpan, 2019 sağat 10:12

Sot "QDT isi" boyınşa ayıp tağılğan Aygül Aqberdievanı aqtadı

6 aqpanda Aqtau qalalıq sotı Qazaqstan biligi tıyım salğan "Qazaqstannıñ demokratiyalıq tañdauı" (QDT) qozğalısınıñ Telegram çatındağı jazbaları üşin "bilikti qwlatpaq boldı" dep ayıptalğan Aygül Aqberdievanı aqtau turalı şeşim şığardı.

Bwl turalı Azattıqqa Aqberdievanıñ advokatı Janar Sündetqalieva habarladı.

- Sot Aqberdievanıñ is-äreketinde qılmıstıq qwram joq dep tauıp, onı tolıq aqtadı jäne bwl is boyınşa sot deyingi tergeu jürgizgen policiya qızmetkerlerine qatıstı jeke wyğarım şığardı, - dedi ol.

Advokattıñ sözinşe, eger prokuror qarsılıq bildirmese sot ükimi 15 künnen soñ küşine enbek.

Bwğan deyin Aygül Aqberdieva sottağı soñğı sözinde kinäsiz ekendigin, ayıbın moyındamaytının mälimdegen edi. Prokuror sud'yadan Aqberdievanı ayıptı dep tanıp, bas bostandığın bes jıl merzimge şekteu jazasın tağayındaudı mwrağan bolatın.

39 jastağı Aygül Aqberdievanıñ üstinen qozğalğan qılmıstıq is boyınşa sot 2018 jılı 24 qırküyekte bastalğan. Sonıñ aldında Aqberdievanıñ küyeui 45 jastağı Ablovas Jwmaev ta QDT çatındağı jazbaları üşin "äleumettik alauızdıq tudırdı", "bilikti küştep qwlatpaq boldı" dep ayıptalıp, sot onı üş jılğa bas bostandığınan ayırğan. 2018 jılı 5 jeltoqsanda Mañğıstau oblıstıq apellyaciyalıq sotı ükimdi küşinde qaldırğan.

Erli-zayıptı Jwmaev pen Aqberdieva özderine tağılğan ayıptıñ sayasi astarı bar dep sanaydı.

2018 jılğı 13 naurızda Astana sotı bas prokuraturanıñ arızımen şetelde twratın bwrınğı bankir äri biliktiñ sınşısı Mwhtar Äbilyazov basqaratın QDT qozğalısın "ekstremistik" dep tanıp, Qazaqstan aumağında tıyım salğan. Sodan beri osı qozğalıstıñ jaqtastarına qarsı birneşe qılmıstıq is qozğalğan edi.

Abai.kz

4 pikir