Seysenbi, 31 Naurız 2020
1385 6 pikir 28 Aqpan, 2019 sağat 14:52

Mecenat student jastarğa şäkirtaqı tağayındadı

Otandıq filantrop jäne professor Oralbek Botbay Mäskeude bilim alıp jatqan studentterge şäkirtaqı tağayındadı. Bwl turalı «Jas twlpar» birlestiginiñ baspasöz qızmeti habarlaydı.

Resmi derekterge säykes, büginde Qazaqstanda jastardıñ sanı şamamen 4 million adamdı qwraydı. Olardıñ arasında 2,3 million jas – qalada, 1,7 millionı auıldı jerlerde twradı. Jastardıñ qoğamnıñ energiyağa tolı böligi ekenin jäne ekonomika bolaşağına salınğan investiciya ekenin eskersek, büginde älemdik qauımdastıqta jastar sayasatın damıtuğa, sonıñ işinde jastarğa beriletin bilim granttarı men şäkiraqılardı arttıru özekti bolıp qaluda.

Osı bastamalarğa säykes 1964 jılı Mäskeude negizi qalanğan «Jas twlpar» qazaq jastar birlestigi arnayı bayqau wyımdastırğan bolatın. Bayqaudıñ bastı şartı – studenttiñ ülgerimi jäne motivaciyalıq esse. Bayqauğa barlığı jiırma ümitker qatıstı. Jobanıñ bastı maqsatı darındı jastardıñ basın qosıp, olardıñ arman-maqsattarına jol aşu deydi wyımdastıruşılar. Biılğı bayqaudıñ erekşeligi – Reseydegi qandastarımızdıñ qatısuımen ayşıqtaldı.

Söytip, qazılar alqasınıñ wzaq keñesuinen keyin eki künge sozılğan bayqaudıñ qorıtındısı boyınşa on bir student şäkirtaqı iegeri atandı. Olar – Mälika Şaykenova, Nargiz Qajıkenova, Wljan Nwğmanova, Güldana Qılışbekova, Almas Isqaqov, Azat Mwqarov, Nwrswltan Naurızbaev, Nwrzada Saqtağanov, Ayşa Asanjanova, Toqjan Orazğali, Aynwr Qiyasova.

– Bwl bayqaudan alğan äserim erekşe. Qarsılastarım da osal bolmadı. Är bir qatısuşı bilimdi. Bayqau joğarı deñgeyde wyımdastırılğan jäne öte ädil ötti dep oylaymın. Jastar jılı Qazaqstan jastarına ülken, äri tarihi mümkindik berip otır. Birinşiden, jastardıñ ruhani jağınan kemldenuine basa nazar audaru qajet. Ekinşiden, bilim mäselesin eskeru kerek. Jastar arasındağı qwqıqtıq mädenietti, qoğamdıq tärtipti küşeytip, qwqıq bwzuşılıq pen sıbaylas jemqorlıqqa müldem tözbeuşiliktiñ qalıptastıru şaralarına basımdıq bergen jön. Osınıñ nätijesinde memlekettik bağdarlamalardıñ tiimdiligi artadı, – deydi jeñimpaz Mälika Şaykenova.

– Jastardı qoldau el ekonomikasınıñ bäsekege qabilettiligin arttıruğa ülken üles qosadı. Bizdiñ taraptan jastarğa ärdayım qoldau boladı. Bügingi bayqauğa Oralbek Botbaydıñ özi qatısıp, jalındı jastarmen tanıstı. Reseyde on eki mıñ qazaqstandıq studentterimiz bilim aluda. Jastar jılında kreativti jobalarmen bölisuge boladı. Degenmen Mäskeude jastar jinalatın arnayı ğimaratımız joq. Bwl bir ülken mäselelerdiñ biri. Eger el ağalarımız şet elde jürgen wşqır oylı, talanttı jastarğa kömek körsetse nwr üstine nwr bolar edi degen oydamın. Bügingi dodağa qatısqan studentterge rizamın. Barlığı öte bilimdi. Osı orayda Oralbek Qojamjarwlına oyı ozıq jastardı qoldağanına alğısımdı bildirgim keledi, – deydi.

Al jastardı arasında mañızdı is-şaranıñ ötuine wyıtqa bolğan bilikti käsipker, atımtay jomart Oralbek Botbay mırza da öz oyın ortağa saldı

–  Biılğı jılı Jastar jılı osı orayda el ağası bolıp jastarğa qamqorlıq tanıtudı parız sanaymın. Eki wlım da Mäskeude bilim alğan, sondıqtan mwnda bilim alıp jatqan jastarımızdıñ jağdayı mağan belgili. Küni keşe elimizde ülken özgerister orın aldı. Elu jılda el jaña demekşi memleketimizdegi özgerister eldiñ damuına negiz boladı degen ümittemin. Biz özimizdiñ tarapımızdan azamat retinde oğan atsalısuımız kerek. Jastardı eñbekke şaqıramın. Eñbek barlığın jeñedi! – dedi Oralbek Qojamjarwlı.

Aynwr Nwrlanqızı

Abai.kz

6 pikir