Jwma, 13 Jeltoqsan 2019
Äne, kördiñ be? 3249 21 pikir 26 Säuir, 2019 sağat 10:15

Ukraina Radası: "Qoş bol, orıs tili!"

Orısşa tildik ahualdan arıludıñ jaña jolın tañdağan Ukraina üş jılğa sozılğa aytıs-tartıstan keyin 25 säuirde Kievte 2082 türli özgertu engizilgen qwjattı ekinşi oqılımda 278 halıq qalaulısınıñ qoldauımen "Ukrain tiliniñ memlekettik til retinde öz qızmetin atqaruı turalı» Zañın qabıldandı.

Osı tüzetuler men özgeristerdi qalt jibermey qadağalau üşin qwrılğan «Profildik komitettiñ» basşısı Nikolay Knyajickiy Rada minberinen: "Bizdiñ bwl zañımız eşbir wlttıq azşılıqtı jäbirlemeydi... Biz barşa azamattardıñ öz üyinde jürgendey sezinuine qoldan kelgenniñ bärin jasaymız. Halıq deputattarı wsınğan köptegen tüzetulerdi eskerdik... Biz zañdı bwzğanı üşin äkimşilik jauapqa tartıludı engizudi üş jılğa şegerdik. Osı uaqıttıñ işinde barlıq oblıstarda ukrain tilinde oqıtatın ortalıqtar qwrılatın boladı... Bwl zañ ukrain tilin armiyağa engizedi, eger äskeriler arasında äldekim ukrainşa söyley almaytın bolsa, oğan eş jaza qoldanılmaydı. Öytkeni, ukrain äskerileri qazirgi kezde ukrainşa ğana söylegendi hoş köredi", - dep mälimdedi.

Nikolay Knyajickiy: «Äri bwl «Til turalı zañ» emes, tek memlekettik tildiñ öz saltanatın qwruına arnalğan zañnama» dedi söziniñ soñında.

Bwl qwjat Ukraina azamattarınıñ memlekettik tilin memlekettik bilik organdarında, Qırım Avtonomiyalıq Respublikasınıñ bilik organdarında, Ukrain jergilikti özin-özi basqaru organdarında, memlekettik jäne kommunaldıq käsiporındarda, mekemeler men wyımdarda, özge de memlekettik jäne kommunaldıq menşik türinde şaruaşılıq jürgizetin sub'ektilerde qoldanıluın retteytin boladı.

Bwl qwjatta sonımen birge ukrain tilin bwqaralıq salalarda: Bilim men ğılımda; mädeniet salasında; tele-radio habarlarda; BAQ; kitap basu men kitap taratuda; elektrondı aqparattıq jüyede; twtınuşılarğa qızmet körsetu salasında; sport, telekommunikaciya men poşta baylanısı, zañgerlik qızmet, densaulıq saqtau, kölik; toponimderdi belgileude, jarnamada, mañdayşalar men jazuşılardı dayındauda; qoğamdıq birlestikter men sayasi partiyalardıñ is-äreketinde, jekemenşik sub'ektileriniñ tauarları men körsetetin qızmetterinde qoldanıluı da qarastırılğan.

Tüyin

Bizdiñ deputattar tildik jağdayı bizden de qiın jağdayda qalsa da orekeñe jaltaqtamaytın ukrain halıq qalaulıları täjiribesinen üyrenuge niet etse ğoy degen qiyalğa beriledi ekensiñ. Äri däl osınday qwjatqa qazaqtıñ qolı qaşan jetedi degen oyğa da qalasıñ?

Äbil-Serik Äliakpar

Abai.kz

21 pikir