سەيسەنبى, 22 قازان 2019
انە، كوردىڭ بە؟ 3137 21 پىكىر 26 ءساۋىر, 2019 ساعات 10:15

ۋكراينا راداسى: "قوش بول، ورىس ءتىلى!"

ورىسشا تىلدىك احۋالدان ارىلۋدىڭ جاڭا جولىن تاڭداعان ۋكراينا ءۇش جىلعا سوزىلعا ايتىس-تارتىستان كەيىن 25 ساۋىردە كيەۆتە 2082 ءتۇرلى وزگەرتۋ ەنگىزىلگەن قۇجاتتى ەكىنشى وقىلىمدا 278 حالىق قالاۋلىسىنىڭ قولداۋىمەن "ۋكراين ءتىلىنىڭ مەملەكەتتىك ءتىل رەتىندە ءوز قىزمەتىن اتقارۋى تۋرالى» زاڭىن قابىلداندى.

وسى تۇزەتۋلەر مەن وزگەرىستەردى قالت جىبەرمەي قاداعالاۋ ءۇشىن قۇرىلعان «پروفيلدىك كوميتەتتىڭ» باسشىسى نيكولاي كنياجيتسكي رادا مىنبەرىنەن: ء"بىزدىڭ بۇل زاڭىمىز ەشبىر ۇلتتىق ازشىلىقتى جابىرلەمەيدى... ءبىز بارشا ازاماتتاردىڭ ءوز ۇيىندە جۇرگەندەي سەزىنۋىنە قولدان كەلگەننىڭ ءبارىن جاسايمىز. حالىق دەپۋتاتتارى ۇسىنعان كوپتەگەن تۇزەتۋلەردى ەسكەردىك... ءبىز زاڭدى بۇزعانى ءۇشىن اكىمشىلىك جاۋاپقا تارتىلۋدى ەنگىزۋدى ءۇش جىلعا شەگەردىك. وسى ۋاقىتتىڭ ىشىندە بارلىق وبلىستاردا ۋكراين تىلىندە وقىتاتىن ورتالىقتار قۇرىلاتىن بولادى... بۇل زاڭ ۋكراين ءتىلىن ارمياعا ەنگىزەدى، ەگەر اسكەريلەر اراسىندا الدەكىم ۋكراينشا سويلەي المايتىن بولسا، وعان ەش جازا قولدانىلمايدى. ويتكەنى، ۋكراين اسكەريلەرى قازىرگى كەزدە ۋكراينشا عانا سويلەگەندى حوش كورەدى", - دەپ مالىمدەدى.

نيكولاي كنياجيتسكي: «ءارى بۇل «ءتىل تۋرالى زاڭ» ەمەس، تەك مەملەكەتتىك ءتىلدىڭ ءوز سالتاناتىن قۇرۋىنا ارنالعان زاڭناما» دەدى ءسوزىنىڭ سوڭىندا.

بۇل قۇجات ۋكراينا ازاماتتارىنىڭ مەملەكەتتىك ءتىلىن مەملەكەتتىك بيلىك ورگاندارىندا، قىرىم اۆتونوميالىق رەسپۋبليكاسىنىڭ بيلىك ورگاندارىندا، ۋكراين جەرگىلىكتى ءوزىن-ءوزى باسقارۋ ورگاندارىندا، مەملەكەتتىك جانە كوممۋنالدىق كاسىپورىنداردا، مەكەمەلەر مەن ۇيىمداردا، وزگە دە مەملەكەتتىك جانە كوممۋنالدىق مەنشىك تۇرىندە شارۋاشىلىق جۇرگىزەتىن سۋبەكتىلەردە قولدانىلۋىن رەتتەيتىن بولادى.

بۇل قۇجاتتا سونىمەن بىرگە ۋكراين ءتىلىن بۇقارالىق سالالاردا: ءبىلىم مەن عىلىمدا; مادەنيەت سالاسىندا; تەلە-راديو حابارلاردا; باق; كىتاپ باسۋ مەن كىتاپ تاراتۋدا; ەلەكتروندى اقپاراتتىق جۇيەدە; تۇتىنۋشىلارعا قىزمەت كورسەتۋ سالاسىندا; سپورت، تەلەكوممۋنيكاتسيا مەن پوشتا بايلانىسى، زاڭگەرلىك قىزمەت، دەنساۋلىق ساقتاۋ، كولىك; توپونيمدەردى بەلگىلەۋدە، جارنامادا، ماڭدايشالار مەن جازۋشىلاردى دايىنداۋدا; قوعامدىق بىرلەستىكتەر مەن ساياسي پارتيالاردىڭ ءىس-ارەكەتىندە، جەكەمەنشىك سۋبەكتىلەرىنىڭ تاۋارلارى مەن كورسەتەتىن قىزمەتتەرىندە قولدانىلۋى دا قاراستىرىلعان.

ءتۇيىن

ءبىزدىڭ دەپۋتاتتار تىلدىك جاعدايى بىزدەن دە قيىن جاعدايدا قالسا دا ورەكەڭە جالتاقتامايتىن ۋكراين حالىق قالاۋلىلارى تاجىريبەسىنەن ۇيرەنۋگە نيەت ەتسە عوي دەگەن قيالعا بەرىلەدى ەكەنسىڭ. ءارى ءدال وسىنداي قۇجاتقا قازاقتىڭ قولى قاشان جەتەدى دەگەن ويعا دا قالاسىڭ؟

ءابىل-سەرىك الياكپار

Abai.kz

21 پىكىر