Särsenbi, 17 Şilde 2019
Bilik 59573 3 pikir 14 Mamır, 2019 sağat 08:17

Toqaev Batıs Qazaqstan oblısınıñ jwrtşılığımen kezdesti

Jiınğa ziyalı qauım, ardagerler men käsipodaq wyımdarı jäne jastar ökilderi, mäslihat deputattarı, memlekettik qızmetşiler qatıstı.

Memleket basşısı öñirdiñ elimizdi örkendetuge qosqan ülesi men damu erekşelikterine toqtaldı.

– Qazaqstannıñ damuına oñ ıqpalın tigizetin mañızdı ölkege erekşe köñil bölinedi. Oblıstıñ geografiyalıq jağdayı, tabiği baylığı men öndiristik bazası öñirdiñ örkendeuine qolaylı. Büginde Aqjayıq aymağı biraz salalar boyınşa eleuli jetistikterge qol jetkizip otır, – dedi Qasım-Jomart Toqaev.

Qazaqstan Prezidenti auıl şaruaşılığı äleueti joğarı öñirde agroöndiristik keşendi damıtu üşin Ükimet pen jergilikti äkimdikke tapsırma berdi.

– Et eksportınıñ körsetkişi öte jaqsı. Degenmen, osı saladağı eñbek önimdiligi tömendegen. Bwl mäseleni Ükimetpen birlesip, jüyeli türde şeşu qajet, – dedi Memleket basşısı.

Qazaqstan Prezidenti oblısta äleumettik nısandar men twrğın üy qwrılıstarınıñ qarqının arttırudı tapsırdı.

– Şeteldik investiciya esebinen eki birdey alıs audannıñ ortalığına dene şınıqtıru jäne sauıqtıru keşenin salu jwmıstarı bastaldı. Bwl – öte jaqsı körsetkiş. Äkimdikke Jastar jılı ayasında barlıq audandardı osınday dene şınıqtıru keşenderimen qamtamasız etudi tapsıramın. Sonımen qatar, twrğın üy qwrılısınıñ qarqının arttıru qajet. Qwrılıs barısın qatañ baqılaudı oblıs äkimine tapsıramın. Äleumettik jağdayı naşar jäne twrmısı tömen köpbalalı otbasılardı baspanamen qamtudı jüyeli türde retteu kerek, – dedi Memleket basşısı.

Qasım-Jomart Toqaev öñirdegi auız su mäselesin şwğıl şeşu qajettigin atap ötti.

– Taza auızsu mäselesi äli de özekti bolıp otır. Eldi mekenderdiñ 45 payızı ğana ortalıqtandırılğan taza auızsumen qamtamasız etilgen. Oblıs äkimine Ükimetpen birlesip, 2020 jılı bwl körsetkişti 80 payızğa deyin jetkizudi tapsıramın, – dedi Qazaqstan Prezidenti.

Memleket basşısı aymaqtıñ kölik-logistikalıq äleuetine erekşe toqtalıp, jergilikti joldardıñ sapasın arttırudıñ mañızdı ekenin atap ötti.

– Öñirdegi jol probleması äli de kün tärtibinen tüspey twr. Oblıstıq mañızı bar joldardıñ 70 payızınıñ sapası sın kötermeydi. Bwl azamattardıñ kündelikti ömirinde qiındıq tuğızadı, sonımen qatar, öñirdiñ eksporttıq jäne tranzittik äleuetin tömendetedi. Elbasınıñ tapsırmasına säykes, Orınbor tas jolın jöndeu jwmıstarı, oñtüstiktegi – Kaztalov, Jänibek jäne Bökey ordası audandarında jol qwrılısı bastalğanın bilemin. Ükimetke jergilikti äkimdikpen birlesip, 2021 jıldıñ soñına deyin osı jwmıstardı ayaqtaudı tapsıramın. Bwl mäsele meniñ jeke baqılauımda boladı, – dedi Qasım-Jomart Toqaev.

Memleket basşısı oblıstağı tozığı jetken elektr jelilerine nazar audardı.

– Oblıstıñ elektr jelileri tozğan. Sol sebepti audandarda jarıqtıñ jii sönui bayqaladı. Mwnday özekti mäseleler şeşilmey, investiciya tartu jäne jaña jwmıs ornın aşu turalı oylauğa bola ma? Osı problemalardı Ükimetpen birlesip, jüyeli türde şeşudi qolğa alu kerek, – dedi Qazaqstan Prezidenti.

Qasım-Jomart Toqaev aşıqtıq pen jariyalılıqtı odan äri damıtudı tapsırdı.

– Barlıq deñgeydegi äkimder azamattardıñ ötinişterine der kezinde, kidirissiz jauap berui qajet. «Aşıq äkimdik» jobası – osı üşin jasalğan alğaşqı qadam. Memlekettik organdardıñ jwmısı «qızmet üşin adam» emes, «adam üşin qızmet» qağidatına beyimdelui kerek, – dedi Memleket basşısı.

Jiın soñında, Qazaqstan Prezidenti elimizdiñ äleumettik-ekonomikalıq jäne mädeni damuına qosqan ülesi üşin «Stroykombinat» jauapkerşiligi şekteuli seriktestiginiñ direktorı B.Nwrbaevtı, «Avtokombinat» jauapkerşiligi şekteuli seriktestiginiñ direktorı V.Golouhovtı, Oblıstıq perinataldıq ortalığınıñ bas därigeri N.Dmitrienkonı jäne Sırım audanı Q.Mırzaliev atındağı orta mekteptiñ tarih päniniñ mwğalimi G.Nwğmanovanı alğıs hattarmen marapattadı.

Abai.kz

3 pikir