بەيسەنبى, 23 مامىر 2019
بيلىك 817 3 پىكىر 14 مامىر, 2019 ساعات 08:17

توقاەۆ باتىس قازاقستان وبلىسىنىڭ جۇرتشىلىعىمەن كەزدەستى

جيىنعا زيالى قاۋىم، ارداگەرلەر مەن كاسىپوداق ۇيىمدارى جانە جاستار وكىلدەرى، ءماسليحات دەپۋتاتتارى، مەملەكەتتىك قىزمەتشىلەر قاتىستى.

مەملەكەت باسشىسى ءوڭىردىڭ ەلىمىزدى وركەندەتۋگە قوسقان ۇلەسى مەن دامۋ ەرەكشەلىكتەرىنە توقتالدى.

– قازاقستاننىڭ دامۋىنا وڭ ىقپالىن تيگىزەتىن ماڭىزدى ولكەگە ەرەكشە كوڭىل بولىنەدى. وبلىستىڭ گەوگرافيالىق جاعدايى، تابيعي بايلىعى مەن وندىرىستىك بازاسى ءوڭىردىڭ وركەندەۋىنە قولايلى. بۇگىندە اقجايىق ايماعى ءبىراز سالالار بويىنشا ەلەۋلى جەتىستىكتەرگە قول جەتكىزىپ وتىر، – دەدى قاسىم-جومارت توقاەۆ.

قازاقستان پرەزيدەنتى اۋىل شارۋاشىلىعى الەۋەتى جوعارى وڭىردە اگرووندىرىستىك كەشەندى دامىتۋ ءۇشىن ۇكىمەت پەن جەرگىلىكتى اكىمدىككە تاپسىرما بەردى.

– ەت ەكسپورتىنىڭ كورسەتكىشى وتە جاقسى. دەگەنمەن، وسى سالاداعى ەڭبەك ونىمدىلىگى تومەندەگەن. بۇل ماسەلەنى ۇكىمەتپەن بىرلەسىپ، جۇيەلى تۇردە شەشۋ قاجەت، – دەدى مەملەكەت باسشىسى.

قازاقستان پرەزيدەنتى وبلىستا الەۋمەتتىك نىساندار مەن تۇرعىن ءۇي قۇرىلىستارىنىڭ قارقىنىن ارتتىرۋدى تاپسىردى.

– شەتەلدىك ينۆەستيتسيا ەسەبىنەن ەكى بىردەي الىس اۋداننىڭ ورتالىعىنا دەنە شىنىقتىرۋ جانە ساۋىقتىرۋ كەشەنىن سالۋ جۇمىستارى باستالدى. بۇل – وتە جاقسى كورسەتكىش. اكىمدىككە جاستار جىلى اياسىندا بارلىق اۋدانداردى وسىنداي دەنە شىنىقتىرۋ كەشەندەرىمەن قامتاماسىز ەتۋدى تاپسىرامىن. سونىمەن قاتار، تۇرعىن ءۇي قۇرىلىسىنىڭ قارقىنىن ارتتىرۋ قاجەت. قۇرىلىس بارىسىن قاتاڭ باقىلاۋدى وبلىس اكىمىنە تاپسىرامىن. الەۋمەتتىك جاعدايى ناشار جانە تۇرمىسى تومەن كوپبالالى وتباسىلاردى باسپانامەن قامتۋدى جۇيەلى تۇردە رەتتەۋ كەرەك، – دەدى مەملەكەت باسشىسى.

قاسىم-جومارت توقاەۆ وڭىردەگى اۋىز سۋ ماسەلەسىن شۇعىل شەشۋ قاجەتتىگىن اتاپ ءوتتى.

– تازا اۋىزسۋ ماسەلەسى ءالى دە وزەكتى بولىپ وتىر. ەلدى مەكەندەردىڭ 45 پايىزى عانا ورتالىقتاندىرىلعان تازا اۋىزسۋمەن قامتاماسىز ەتىلگەن. وبلىس اكىمىنە ۇكىمەتپەن بىرلەسىپ، 2020 جىلى بۇل كورسەتكىشتى 80 پايىزعا دەيىن جەتكىزۋدى تاپسىرامىن، – دەدى قازاقستان پرەزيدەنتى.

مەملەكەت باسشىسى ايماقتىڭ كولىك-لوگيستيكالىق الەۋەتىنە ەرەكشە توقتالىپ، جەرگىلىكتى جولداردىڭ ساپاسىن ارتتىرۋدىڭ ماڭىزدى ەكەنىن اتاپ ءوتتى.

– وڭىردەگى جول پروبلەماسى ءالى دە كۇن تارتىبىنەن تۇسپەي تۇر. وبلىستىق ماڭىزى بار جولداردىڭ 70 پايىزىنىڭ ساپاسى سىن كوتەرمەيدى. بۇل ازاماتتاردىڭ كۇندەلىكتى ومىرىندە قيىندىق تۋعىزادى، سونىمەن قاتار، ءوڭىردىڭ ەكسپورتتىق جانە ترانزيتتىك الەۋەتىن تومەندەتەدى. ەلباسىنىڭ تاپسىرماسىنا سايكەس، ورىنبور تاس جولىن جوندەۋ جۇمىستارى، وڭتۇستىكتەگى – كازتالوۆ، جانىبەك جانە بوكەي ورداسى اۋداندارىندا جول قۇرىلىسى باستالعانىن بىلەمىن. ۇكىمەتكە جەرگىلىكتى اكىمدىكپەن بىرلەسىپ، 2021 جىلدىڭ سوڭىنا دەيىن وسى جۇمىستاردى اياقتاۋدى تاپسىرامىن. بۇل ماسەلە مەنىڭ جەكە باقىلاۋىمدا بولادى، – دەدى قاسىم-جومارت توقاەۆ.

مەملەكەت باسشىسى وبلىستاعى توزىعى جەتكەن ەلەكتر جەلىلەرىنە نازار اۋداردى.

– وبلىستىڭ ەلەكتر جەلىلەرى توزعان. سول سەبەپتى اۋدانداردا جارىقتىڭ ءجيى ءسونۋى بايقالادى. مۇنداي وزەكتى ماسەلەلەر شەشىلمەي، ينۆەستيتسيا تارتۋ جانە جاڭا جۇمىس ورنىن اشۋ تۋرالى ويلاۋعا بولا ما؟ وسى پروبلەمالاردى ۇكىمەتپەن بىرلەسىپ، جۇيەلى تۇردە شەشۋدى قولعا الۋ كەرەك، – دەدى قازاقستان پرەزيدەنتى.

قاسىم-جومارت توقاەۆ اشىقتىق پەن جاريالىلىقتى ودان ءارى دامىتۋدى تاپسىردى.

– بارلىق دەڭگەيدەگى اكىمدەر ازاماتتاردىڭ وتىنىشتەرىنە دەر كەزىندە، كىدىرىسسىز جاۋاپ بەرۋى قاجەت. «اشىق اكىمدىك» جوباسى – وسى ءۇشىن جاسالعان العاشقى قادام. مەملەكەتتىك ورگانداردىڭ جۇمىسى «قىزمەت ءۇشىن ادام» ەمەس، «ادام ءۇشىن قىزمەت» قاعيداتىنا بەيىمدەلۋى كەرەك، – دەدى مەملەكەت باسشىسى.

جيىن سوڭىندا، قازاقستان پرەزيدەنتى ەلىمىزدىڭ الەۋمەتتىك-ەكونوميكالىق جانە مادەني دامۋىنا قوسقان ۇلەسى ءۇشىن «سترويكومبينات» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ب.نۇرباەۆتى، «اۆتوكومبينات» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ۆ.گولوۋحوۆتى، وبلىستىق پەريناتالدىق ورتالىعىنىڭ باس دارىگەرى ن.دميتريەنكونى جانە سىرىم اۋدانى ق.مىرزاليەۆ اتىنداعى ورتا مەكتەپتىڭ تاريح ءپانىنىڭ مۇعالىمى گ.نۇعمانوۆانى العىس حاتتارمەن ماراپاتتادى.

Abai.kz

3 پىكىر