Senbi, 24 Tamız 2019
2493 20 pikir 14 Tamız, 2019 sağat 13:44

Orısşa bilmeseñ Äkemteatrğa jwmısqa twra almaysıñ...

Almatı qalasındağı ataqtı M.Əuezov atındağı Qazaq memlekettik akademiyalıq drama teatrı baqılauşı bolıp jwmıs isteytin qızmetker qabıldap jatır eken. Soğan arnayı kasting jariyalaptı. 

Äkemteatrğa jwmısqa twrğısı kelgen qızdardıñ boyınan tömendigi şarttar tabıluı kerek eken:

1. Jası 18-25 aralığında;
2. Boyı 1,65 sm tömen emes;
3. Sonday-aq, teatr tarihın biletin jäne teatr repertuarındağı qoyılımdardan habarı bolu:
4. Qazaq jäne orıs tilderinde erkin söyley alu.

Bwndağı alğaşqı eki şart käsibi twrğıdan kerek bolar, oğan bizdiñ dauımız joq. Al üşinşi şarttıñ öte qajat ekeni sözsiz, teatrda jwmıs istegisi kelgen adam teatr jaylı bilgeni jön. Biraq törtinşisi säl tompaqtau bolıp twr. Qazaq memlekettik akademiyalıq drama teatrına jwmısqa twru üşin orıs tilin erkin meñgerudiñ qajeti qanşa?!

Teatr äkimşiliginiñ jazuınşa, "baqılauşı – körermenderge mädenietti, sapalı qızmet körsetu, olarğa qolaylı jağdaylar jasau boyınşa, basqa da jwmıstardı jüzege asıruşı adam" eken.

Teatrğa barıp twratın kisiler jaqsı biledi. Wlttıq naqışta kiingen bir top qaraközderimiz kelgen qonaqtardı kütip alıp, otırar ornın nwsqap jüredi. Kil körikti, mädenietti qızdar. Körermenniñ köñilinen şığu üşin barın saladı. Keyde tipti ata-äjelerdiñ qoltığınan demep, jetelep bara jatadı. Sonday jarasımdı, jağımdı. Osınday qaraközderge orıs tilin erkin meñgeru ne üşin kerek?

Älde Äuezov teatrınıñ tabaldırığın qazqaşa bir auız söz bilmeytin özge wlt ökilderi tozdırıp jür me? Bwlay boluı mümkin emes. Öytkeni, bir auız qazaqşa bilmeytin adam qazaq tilindegi qoyılımdarğa barıp qaytedi. Al biren-saran orıstildileu qazaqtarmen tüsinisu üşin "nan swrauğa jetetin" orısşanıñ özi jaraydı. Ol üşin Resey eliniñ tilin erkin meñgerudiñ eş qajeti joq.

Biraq, Qazaq memlekettik akademiyalıq drama teatrınıñ äkimşiligi orıs tilin erkin meñgergen qızdardı ğana jwmısqa alamız dep otır. Sonda Reseydiñ memlekettik tilin erkin meñgermegen qaraközderimizge Äkemteatrdıñ özinen orın tabılmay ma?! Qoyılımdarı tek qazaqşa, körermenderi tek qazaq Äkemteatrda jwmıs isteu üşin Qazaqstan Respublikasınıñ memlekettik tilin meñgeru jetkiliksiz be, älde?

Köp til biletin, jan-jaqtı bilimdi qızmetker barlıq mekemege kerek. Äuezov teatrında da ağılşın, orıs, japon tilin biletin qız-jigitter jwmıs istese eş artıqtığı joq. Biraq bwl tilderdi bilmegeni üşin öz elinde twrıp jatıp eş qazaqtıñ jwmıstan qağıluına bolmaydı. Sol üşin Äuezov teatrınıñ orıs tilin erkin meñgerudi jwmısqa adam aludıñ alğı şartı etui dwrıs emes!

Mümkin baqılauşı qızmetiniñ jwmıs kölemi biz aytqannan äldeqayda auqımdı şığar. Keyde şınımen de orıs tilin qoldanuğa tura keler. Biraq Qazaqstanda memlekettik til qazaq tili. Sol üşin jwmısqa twrğısı kelgen adam aldımen orıs tilin emes, qazaq tilin erkin meñgerui kerek. Basqa-basqa Qazaq memlekettik akademiyalıq drama teatrınıñ orıs tilin erkin meñgermegen qaraközderimizdi jwmıstan qağuı jönsizdik. Teatr äkimşiligi bwl uäjimizge jauap beredi degen senimdemiz...

Quanış Qappas

Abai.kz

20 pikir