الماتى قالاسىنداعى اتاقتى م.Əۋەزوۆ اتىنداعى قازاق مەملەكەتتىك اكادەميالىق دراما تەاترى باقىلاۋشى بولىپ جۇمىس ىستەيتىن قىزمەتكەر قابىلداپ جاتىر ەكەن. سوعان ارنايى كاستينگ جاريالاپتى. 

اكەمتەاترعا جۇمىسقا تۇرعىسى كەلگەن قىزداردىڭ بويىنان تومەندىگى شارتتار تابىلۋى كەرەك ەكەن:

1. جاسى 18-25 ارالىعىندا;
2. بويى 1,65 سم تومەن ەمەس;
3. سونداي-اق، تەاتر تاريحىن بىلەتىن جانە تەاتر رەپەرتۋارىنداعى قويىلىمداردان حابارى بولۋ:
4. قازاق جانە ورىس تىلدەرىندە ەركىن سويلەي الۋ.

بۇنداعى العاشقى ەكى شارت كاسىبي تۇرعىدان كەرەك بولار، وعان ءبىزدىڭ داۋىمىز جوق. ال ءۇشىنشى شارتتىڭ وتە قاجات ەكەنى ءسوزسىز، تەاتردا جۇمىس ىستەگىسى كەلگەن ادام تەاتر جايلى بىلگەنى ءجون. بىراق ءتورتىنشىسى ءسال تومپاقتاۋ بولىپ تۇر. قازاق مەملەكەتتىك اكادەميالىق دراما تەاترىنا جۇمىسقا تۇرۋ ءۇشىن ورىس ءتىلىن ەركىن مەڭگەرۋدىڭ قاجەتى قانشا؟!

تەاتر اكىمشىلىگىنىڭ جازۋىنشا، "باقىلاۋشى – كورەرمەندەرگە مادەنيەتتى، ساپالى قىزمەت كورسەتۋ، ولارعا قولايلى جاعدايلار جاساۋ بويىنشا، باسقا دا جۇمىستاردى جۇزەگە اسىرۋشى ادام" ەكەن.

تەاترعا بارىپ تۇراتىن كىسىلەر جاقسى بىلەدى. ۇلتتىق ناقىشتا كيىنگەن ءبىر توپ قاراكوزدەرىمىز كەلگەن قوناقتاردى كۇتىپ الىپ، وتىرار ورنىن نۇسقاپ جۇرەدى. كىل كورىكتى، مادەنيەتتى قىزدار. كورەرمەننىڭ كوڭىلىنەن شىعۋ ءۇشىن بارىن سالادى. كەيدە ءتىپتى اتا-اجەلەردىڭ قولتىعىنان دەمەپ، جەتەلەپ بارا جاتادى. سونداي جاراسىمدى، جاعىمدى. وسىنداي قاراكوزدەرگە ورىس ءتىلىن ەركىن مەڭگەرۋ نە ءۇشىن كەرەك؟

الدە اۋەزوۆ تەاترىنىڭ تابالدىرىعىن قازقاشا ءبىر اۋىز ءسوز بىلمەيتىن وزگە ۇلت وكىلدەرى توزدىرىپ ءجۇر مە؟ بۇلاي بولۋى مۇمكىن ەمەس. ويتكەنى، ءبىر اۋىز قازاقشا بىلمەيتىن ادام قازاق تىلىندەگى قويىلىمدارعا بارىپ قايتەدى. ال بىرەن-ساران ورىستىلدىلەۋ قازاقتارمەن ءتۇسىنىسۋ ءۇشىن "نان سۇراۋعا جەتەتىن" ورىسشانىڭ ءوزى جارايدى. ول ءۇشىن رەسەي ەلىنىڭ ءتىلىن ەركىن مەڭگەرۋدىڭ ەش قاجەتى جوق.

بىراق، قازاق مەملەكەتتىك اكادەميالىق دراما تەاترىنىڭ اكىمشىلىگى ورىس ءتىلىن ەركىن مەڭگەرگەن قىزداردى عانا جۇمىسقا الامىز دەپ وتىر. سوندا رەسەيدىڭ مەملەكەتتىك ءتىلىن ەركىن مەڭگەرمەگەن قاراكوزدەرىمىزگە اكەمتەاتردىڭ وزىنەن ورىن تابىلماي ما؟! قويىلىمدارى تەك قازاقشا، كورەرمەندەرى تەك قازاق اكەمتەاتردا جۇمىس ىستەۋ ءۇشىن قازاقستان رەسپۋبليكاسىنىڭ مەملەكەتتىك ءتىلىن مەڭگەرۋ جەتكىلىكسىز بە، الدە؟

كوپ ءتىل بىلەتىن، جان-جاقتى ءبىلىمدى قىزمەتكەر بارلىق مەكەمەگە كەرەك. اۋەزوۆ تەاترىندا دا اعىلشىن، ورىس، جاپون ءتىلىن بىلەتىن قىز-جىگىتتەر جۇمىس ىستەسە ەش ارتىقتىعى جوق. بىراق بۇل تىلدەردى بىلمەگەنى ءۇشىن ءوز ەلىندە تۇرىپ جاتىپ ەش قازاقتىڭ جۇمىستان قاعىلۋىنا بولمايدى. سول ءۇشىن اۋەزوۆ تەاترىنىڭ ورىس ءتىلىن ەركىن مەڭگەرۋدى جۇمىسقا ادام الۋدىڭ العى شارتى ەتۋى دۇرىس ەمەس!

مۇمكىن باقىلاۋشى قىزمەتىنىڭ جۇمىس كولەمى ءبىز ايتقاننان الدەقايدا اۋقىمدى شىعار. كەيدە شىنىمەن دە ورىس ءتىلىن قولدانۋعا تۋرا كەلەر. بىراق قازاقستاندا مەملەكەتتىك ءتىل قازاق ءتىلى. سول ءۇشىن جۇمىسقا تۇرعىسى كەلگەن ادام الدىمەن ورىس ءتىلىن ەمەس، قازاق ءتىلىن ەركىن مەڭگەرۋى كەرەك. باسقا-باسقا قازاق مەملەكەتتىك اكادەميالىق دراما تەاترىنىڭ ورىس ءتىلىن ەركىن مەڭگەرمەگەن قاراكوزدەرىمىزدى جۇمىستان قاعۋى جونسىزدىك. تەاتر اكىمشىلىگى بۇل ۋاجىمىزگە جاۋاپ بەرەدى دەگەن سەنىمدەمىز...

قۋانىش قاپپاس

Abai.kz