Jwma, 15 Qaraşa 2019
Alañ 14464 63 pikir 25 Qırküyek, 2019 sağat 18:17

Uayımı joqtardıñ emes, jağdayı joqtardıñ sözin söyleñiz, Senator hanım!

Belgili telejürgizuşi Dana Nwrjigit tamız ayınıñ basında Qazaqstan Parlamenti Senatınıñ deputatı bolıp tağayındalğan edi. 

Senattıñ tabaldırığın «Ülken diirmenge, maydanğa ketip bara jatırmın» dep wrandatıp attağan Dana hanım "maydan dalasındağı" jorığın bastap ketken eken. Ökiniştisi, jaña jwmısına bilek sıbana kirisken senator alğaşqı qadamın öte sätsiz jasadı.

Qazir bilik basındağılar eldegi jağdayı tömen otbasılardı barınşa jağımsız beynede körsetip, olardı qoğamnıñ masılı retinde tanıtuğa tırısuda. Tipti äleumettik kömek swrağan köpbalalı analardan "halıq jauın" jasauğa talpınıp bağuda. Bwl nietterin keyde säl sıpayılap, janama ädistermen jetkizse, keyde közdi baqıraytıp qoyıp "balanı özderiñ üşin taptıñdar, özderiñ bağıñdar" degendi aşıq aytadı.

Janama ädisteriniñ eñ tanımal türi, keybir tabısqa jetken köpbalalı analardıñ ükimetten kömek swramağanın erlik retinde sipattap, solardı jarnamalaydı. Alğaş analar dauı şıqqanda aqparat qwraldarında qaltalı köpbalalı analardıñ "erlik-dastandarı" qaptap ketti. Olar özderiniñ qanşa balası bar ekenin, olardı eşkimge qol jaymay qalay asırap otırğandarın jır etip ayttı. Külkilisi sol, bwl analardıñ köbi käsipker äyelder bolatın. Basqaşa aytqanda, twrmıs jağdayı äu bastan jaqsı. Sol jağdayına say birneşe bala tärbielep otırğan analar. Öz qolı öz auızına jetip otırğan tabıstı äyelderdi otbası-oşaq qasında qinalıp otırğan analarmen salıstıru qanşalıq ädiletti?!

Qwrmetti bilik ieleri, köpbalalı analardıñ bäri ükimetten kömek swrap jürgen joq. Tek twrmısta tarşılıq körgender ğana bilikten bir qayır kütedi. Sondıqtan, jaqsı tabıs tauıp, özderin asırap otırğan analardıñ auızına söz salıp, özgelerdiñ namısına tigendi qoyıñızdar.

Dana hanım deputat bolıp tağayındalğan kezde «Halıq amanatın köterip, köptiñ ümitin aqtau endi bizdiñ buınğa jüktelip otır. Arıq söylep, semiz şıqsın deymin...Qal-qauqarımşa adal eñbek etip, el ömirinen ajıramay, kabinet qızmetkeri emes, halıq qızmetşisi boluğa wmtılamın», - dep söz bergen edi. Osılay degen halıqtıñ süyikti qızı biliktiñ eñ bir ädiletsiz, las ädisimen halıqtıñ özine qarsı şığıp otır...

Bwlay deuimizge sebep, Dana hanım Instagram jelisindegi jeke paraqşasında video jariyalap, analardı ükimetten kömek swramauğa ügittegen eken. Video «Bizde bäri bar. Wyat boladı» dep ataladı. Videodan wqqanımız, bwl kisige ukol salıp jürgen medbikeniñ bes balası bar eken. Biraq ol özge köpbalalı analarmen birge ükimetten kömek swrağandı namıs köredi. Öz küşimen balaların asırap otır. Sondıqtan özge analar da şulay bermey, osı medbikeden ülgi aluı kerek eken.

Maqpal Süleymenova esimdi medbike de senatordıñ sözine erip, analardı alañğa şıqqan uaqıtta jwmıs istep aqşa tabu kerek edi dep kinälaydı. Ataqtı "hit" söz «balanı öziñ tudıñ, öziñ bağuıñ kerek. Bala degen mindetti arqalağan ekensiñ öziñ asırauıñ kerek» dep aqıl aytadı.

Senator bergen mälimetterge süyensek, Süleymenova esimdi azamatşa Nwr-Swltan qalasındağı emhanalardıñ birinde medbike. Negizgi jwmısına qosımşa kişkentay balalarğa massaj jasap tabıs tabadı eken. Onıñ üstine küyeui İİM-de tergeuşi bolıp jwmıs isteydi. Basqaşa aytqanda, bay bolmasa da tabıstarı täp-täuir otbası. Bwlar ärine ükimetten kömek swramaydı.

Dana hanım «Maqpaldıñ sözinşe, jwmıs isteymin degen adamğa, "eki qolğa bir kürek" qaşan da tabıladı. Sodan soñ namıs jibermeydi» dep tüyindeydi oyın.

Siz bilmeseñiz biz aytayıq, Senator hanım. Ükimetten kömek swrağan analar namıssızdıqtan, jalqaulıqtan solay jürgen joq. Birinşiden, bizdiñ eldegi jwmıssızdıq mäselesi öte auır. Bes bala tauıp üyde otırğan analardı qoyıp, eki-üş diplom arqalağan jastardıñ özi jwmıs tappay sendelip jür. Ekinşiden, jañağı üyde otırğan köpbalalı analardıñ küyeuleri qwrlısta, bazarda az aylıqqa jwmıs istep jür. Tipti keybirinde ol jwmıs ta joq. Aylığı şaylığına da jetpeydi. Olardıñ bäri policey, bäri medbike-däriger emes. Birinde baspana joq, birinde basqalqa joq.

Otbasın öz küşimen bağa alatın köpbalalı ananı tauıp, ülgi etken ekensiz. Tarazınıñ basın teñ wstau üşin, ükimetten kömek swrap jürgen bir ananıñ da pikirin biliñiz. Baspanası joq, isteytin jwmısı joq, qinalğan ana ne der eken sizge?! Sizder, deputattar jağdayı jaqsı, şalqıp jürgen az halıqtıñ emes, qinalğan köpşiliktiñ küy-jayın aytularıñız kerek.

Tek Dana hanım ğana emes, jalpı qazaq biliginiñ ükimetten kömek swrağan köpbalalı analardı kinälap, olardı masıl retinde körsetuge eş qaqısı joq. «Balanı öziñ tudıñ ba, öziñ asıra» degen öz sözderiñizdiñ tonın aynaldırsaq, öz halqınıñ aldında jauap beruge, olardıñ mäselesin şeşuge bilik mindetti. Onıñ üstine bilik halıqtı asırap otırğan joq, qayta halıq bilikti asırap otır. Sondıqtan, memlekettiñ qazınasın sol memlekettiñ halqına beruden tarılmañızdar. «Aşıqqan wrı, aşınğan dolı boladı» deydi. Onsız da qinalğan halıqtı, aqılğa sıymaytın sözderdi aytıp aşındırmañızdar...

Quanış Qappas

Abai.kz

63 pikir