Jwma, 22 Qaraşa 2019
Masqara! 4321 26 pikir 14 Qazan, 2019 sağat 17:46

Eki bet jazbadan 70 qate jibergen sud'ya sauattı ma?

Nwr-Swltan qalasında Islam Äbişevtiñ isi boyınşa sot processi ötip jatır. Islam Äbişevtiñ ne üşin sotqa tartılıp jatqanı bölek äñgime. Bizdiñ qazir aytpağımız istke jauaptı sud'yanıñ memlekettik tilge körsetken qwrmetsizdigi turalı bolıp otır.

Islam Äbişevtiñ advokatı Abzal Qwspan mırzanıñ 33 betten twratın 6 ötinişine sud'ya M.Q.Mekemtas jauap qaytarıptı. 2 betten twratın şağın jauap hatta äriptik, stilistikalıq jäne logikalıq qatelikter örip jür. Qıp-qızıl qatege tolı resmi hattıñ sureti äleumettik jelide tarap, qızu talqığa tüsip jatır.

Atalğan hattıñ birinşi jolınan bastap, eñ soñğı jolına deyin qıp-qızıl qate. Mäselen, birinşi jolda "30 kırküyek" dep jazılğan. "Q" men "K"-ni ayıra almaytın sud'yanıñ hatı kal'ka sözder men qate qoldanıstarğa tolıp twr. Bwl jerde ütir-nükteler men kişigirim äriptik qateler jaylı aytıp otırudıñ özi artıq.

Mülde baylanıspaytın söylemderdi oqığanda memlekettik tildi mwnşa qor qılğan sud'yanıñ özin sotqa tartu kerek şığar degen oyğa qalasız. Mäselen:

"Sottaluşılar I.Abişevke jäne S.A.Tukievke qatıstı küzetpen wstau turalı bwltartpau şarasın özgertip, «üy qamağına» auıstıru, qılmıstıq isti prokurorğa keri qaytaru nemese qısqartu, kuä retinde A.Şpekbaevtı bastı sot talqılauına şaqıru turalı qorğauşı - advokattardıñ ötinişteri qanağattandırusızğa jatadı" - deydi.

Sözimiz bwrmalandı demes üşin twtas abzactı tolıq alıp otırmız. Osındağı "A.Şpekbaevtı bastı sot talqılauına şaqıru turalı qorğauşı - advokattardıñ ötinişteri qanağattandırusızğa jatadı" - degen söylemnen ne tüsinuge boladı?! Qazaq tilinen bastauıştıq deñgeyde sauatı bar adamnıñ özi bwnday söylem qwramas edi. Demek, bizdiñ qwrmetti sud'yanıñ memlekettik tildi meñgerui bastauış deñgeyinen de tömen bolıp otır.

Qısqası, sud'ya eki bettik şağın jauap hatında 70-ten asa qate jibergen. Bwnday deñgeydegi sud'ya M.Q.Mekemtasqa memlekettik tildi basınan bastap qayta üyretu kerek şığar. Äytpese, memlekettik tilge degen qwrmet eşqaşan bolmaydı.

Bizdegi jalqı swraq - eki bet jazbadan 70-ten asa qate jibergen sud'ya sauattı ma?

Abai.kz

26 pikir