بەيسەنبى, 26 قاراشا 2020
COVID-19 قازاقستاندا. جۇقتىرعاندار — 128400. جازىلعاندار — 114821. قايتىس بولعاندار — 1990
ماسقارا! 5833 26 پىكىر 14 قازان, 2019 ساعات 17:46

ەكى بەت جازبادان 70 قاتە جىبەرگەن سۋديا ساۋاتتى ما؟

نۇر-سۇلتان قالاسىندا يسلام ابىشەۆتىڭ ءىسى بويىنشا سوت پروتسەسسى ءوتىپ جاتىر. يسلام ابىشەۆتىڭ نە ءۇشىن سوتقا تارتىلىپ جاتقانى بولەك اڭگىمە. ءبىزدىڭ قازىر ايتپاعىمىز ىستكە جاۋاپتى سۋديانىڭ مەملەكەتتىك تىلگە كورسەتكەن قۇرمەتسىزدىگى تۋرالى بولىپ وتىر.

يسلام ابىشەۆتىڭ ادۆوكاتى ابزال قۇسپان مىرزانىڭ 33 بەتتەن تۇراتىن 6 وتىنىشىنە سۋديا م.ق.مەكەمتاس جاۋاپ قايتارىپتى. 2 بەتتەن تۇراتىن شاعىن جاۋاپ حاتتا ارىپتىك، ستيليستيكالىق جانە لوگيكالىق قاتەلىكتەر ءورىپ ءجۇر. قىپ-قىزىل قاتەگە تولى رەسمي حاتتىڭ سۋرەتى الەۋمەتتىك جەلىدە تاراپ، قىزۋ تالقىعا ءتۇسىپ جاتىر.

اتالعان حاتتىڭ ءبىرىنشى جولىنان باستاپ، ەڭ سوڭعى جولىنا دەيىن قىپ-قىزىل قاتە. ماسەلەن، ءبىرىنشى جولدا "30 كىركۇيەك" دەپ جازىلعان. "ق" مەن "ك"-ءنى ايىرا المايتىن سۋديانىڭ حاتى كالكا سوزدەر مەن قاتە قولدانىستارعا تولىپ تۇر. بۇل جەردە ءۇتىر-نۇكتەلەر مەن كىشىگىرىم ارىپتىك قاتەلەر جايلى ايتىپ وتىرۋدىڭ ءوزى ارتىق.

مۇلدە بايلانىسپايتىن سويلەمدەردى وقىعاندا مەملەكەتتىك ءتىلدى مۇنشا قور قىلعان سۋديانىڭ ءوزىن سوتقا تارتۋ كەرەك شىعار دەگەن ويعا قالاسىز. ماسەلەن:

"سوتتالۋشىلار ي.ابيشەۆكە جانە س.ا.تۋكيەۆكە قاتىستى كۇزەتپەن ۇستاۋ تۋرالى بۇلتارتپاۋ شاراسىن وزگەرتىپ، «ءۇي قاماعىنا» اۋىستىرۋ، قىلمىستىق ءىستى پروكۋرورعا كەرى قايتارۋ نەمەسە قىسقارتۋ، كۋا رەتىندە ا.شپەكباەۆتى باستى سوت تالقىلاۋىنا شاقىرۋ تۋرالى قورعاۋشى - ادۆوكاتتاردىڭ وتىنىشتەرى قاناعاتتاندىرۋسىزعا جاتادى" - دەيدى.

ءسوزىمىز بۇرمالاندى دەمەس ءۇشىن تۇتاس ابزاتستى تولىق الىپ وتىرمىز. وسىنداعى "ا.شپەكباەۆتى باستى سوت تالقىلاۋىنا شاقىرۋ تۋرالى قورعاۋشى - ادۆوكاتتاردىڭ وتىنىشتەرى قاناعاتتاندىرۋسىزعا جاتادى" - دەگەن سويلەمنەن نە تۇسىنۋگە بولادى؟! قازاق تىلىنەن باستاۋىشتىق دەڭگەيدە ساۋاتى بار ادامنىڭ ءوزى بۇنداي سويلەم قۇراماس ەدى. دەمەك، ءبىزدىڭ قۇرمەتتى سۋديانىڭ مەملەكەتتىك ءتىلدى مەڭگەرۋى باستاۋىش دەڭگەيىنەن دە تومەن بولىپ وتىر.

قىسقاسى، سۋديا ەكى بەتتىك شاعىن جاۋاپ حاتىندا 70-تەن اسا قاتە جىبەرگەن. بۇنداي دەڭگەيدەگى سۋديا م.ق.مەكەمتاسقا مەملەكەتتىك ءتىلدى باسىنان باستاپ قايتا ۇيرەتۋ كەرەك شىعار. ايتپەسە، مەملەكەتتىك تىلگە دەگەن قۇرمەت ەشقاشان بولمايدى.

بىزدەگى جالقى سۇراق - ەكى بەت جازبادان 70-تەن اسا قاتە جىبەرگەن سۋديا ساۋاتتى ما؟

ابزال قۇسپان

Abai.kz

26 پىكىر