Beysenbi, 21 Qaraşa 2019
Alañ 2542 29 pikir 17 Qazan, 2019 sağat 15:23

Senatorlardıñ söz sayısı: Kimdiki dwrıs?

Bügin Senat otırısında Dana Nwrjigit auıl şaruaşılığı salasında nesie beru mäselesine toqtaldı. Senatordıñ aytuınşa, memlekettik "Örleu", "Bastau" siyaqtı bağdarlamalar boyınşa qarjı alğandar, sol aqşağa üyin jöndep, qwdayı berip, qwda şaqıratın körinedi.

Sonımen qatar, Dana hanım "Damu" qorında jwmıs isteytin jurnalist äriptesimen kezdesip, söyleskenin aytadı. Aytuınşa, "Damu" qorına kelip tüsetin swraqtardıñ köbi jeke bastıñ şaruasınan aspaytın körinedi. Jäne halıqtıñ qarjılıq sauattılığı öte tömen deydi olar.

-Tek "Men nesie ala alamın ba?", "Men osığan deyingi nesielerdi sizder arqılı jaba alamın ba?" degen siyaqtı swraqtardıñ ayasınan şıqpaydı eken. Sosın "Örleu", "Bastau" siyaqtı bağdarlamalar boyınşa qarjı aldım, biznes bastaytın boldım dep aqşanı aladı, al keyin üyine jöndeu jwmıstarın jürgizip, ya bolmasa, qwdayı berip, qwda şaqırıp, sonday öziniñ jeke basınıñ şarualarına aqşanı jwmsap jiberedi eken. "Al ükimetke qanday esep beresiñ? Qalay esep beresiñ? "dese, körşiniñ bwzauın äkelip, körsete salamın dep, aqşanı dalağa şaşqan bolıp şığadı, - deydi Dana Nwrjigit.

Al, senator Äli Bektaev äriptesimen kelispeytinin ayttı. Bektaevtıñ aytuınşa, auıldıñ twrğındarın sauatı tömen, qarjını qalay bolsa, solay jwmsaydı deuge bolmaydı deydi.

- Negizi, men söyleymin degen oyım da bolğan joq edi. Biraq bügin qoyılğan biraz swraq pen jauap türtki bolıp otır. Birinşiden, aytayın degenim, auıldıñ twrğındarına sauatı tömen, qarjını qalay bolsa, solay jwmsaytın halıqtıñ bir böligi dep qaraudı qoyu kerek. Qwdayğa şükir, qazirgi uaqıtta auıl twrğındarınıñ sauatı da jaqsı, alıp jatqan qarjısın da öndiriske jwmsap jatır. Auıldıñ malı da, janı da ösip jatır. Alıp jatqan qarjısı şetke ketip jatqan joq, - dedi Bektaev.

Onıñ aytuınşa, nesie alıp, basqa maqsatqa jwmsaytın jağday qalada da bar. Sondıqtan, onday mäselelermen qarjı organdarı jwmıs jasauı kerek deydi.

-Mümkin, jañağıday qwdalıqqa, bolmasa, qwdayığa jwmsalıp jatqan jağdaylar bar şığar. Biraq onday jağdaylar qalada da bar. Qalanıñ adamdarı da nesie alıp, basqa maqsatqa jwmsap jatır. Onday jağdaylar öte köp. Ol mäselelermen qarjı instituttarı, bolmasa, qarjı organdarı jwmıs jasauı kerek. Onıñ basın aşıp, kerek adamdardı jauapqa tartsın. Al, endi, auıldıñ twrğındarı osınday dep, bağa beruge bolmaydı dep esepteymin, - dedi senator.

Sonımen qatar, ol auıl twrğındarına berilip jatqan nesieniñ payızı öte joğarı ekenin ayttı. Al, qarjı organdarı bwl mäseleni türli sebeptermen aldausıratıp kele jatqan körinedi.

-Jeñildetilgen nesie beru salasında da şeşilmegen problemalar köp. Mısalı, auıl twrğındarınıñ alıp jatqan nesiesine qoyılatın payızdıq stavkalar öte joğarı dep esepteymiz. Auıl twrğındarı osı qarjı instituttarı byudjetten ol qarjını 0,01 payızben aladı da, nege bizge 7 payızben beredi dep swraydı. Büginde bizde osı swraqtarğa jauap joq. Bwl mäseleni birneşe ret köterdik. Biraq qarjı organdarı türli sebeptermen aldausıratıp keledi.

Tüyin. Sonımen, senator aytqanday halıqtıñ saualı nege jeke bastıñ mäselesinen aspaydı? Olar memleketten alğan nesiesine şınımen üy jöndep, qwda kütip, maqsatsız jwmsay ma, älde, Bektaev mırza aytqanday halıqtıñ nesiesine qoyılatın payızdıq stavkanı azaytu kerek pe? Sentatorlardıñ söz talasına Siz ne deysiz?

Abai.kz

29 pikir