****
Үйдегі шеше, келген жерінде ене айтар кеңесті, ең алдымен, өз қалтасын қампайтуды көздеген ақыл сатқыштардан түрлі мейрамханада отырып тыңдаса, миына ми қосыла ма, адамдардың ақылы таси ма? Мейлі ғой, қалай, қайда жұмсаймын десе де, әркімнің өз ақшасы. Мұнайлы өлкелерге әншілер де, ақыл сатқыштар әуес. Кілең ақымақ келіндер мен той жасағыш байлар сонда тұрады өйткені. Тағы да мейлі ғой... Бірақ деймін де... Ақшаның соңына түсіп сандалып екіге екіні қосқанда төрт болатынын ақы төлеткізіп айтып жүргендер өзінің баласына ана болып мейірім төкпейтінін неге ұқпайды екен. Әйел болып асүйге кіріп тамақ пісіре ме солар? Пісіре алады-ау, бірақ секектеп мейрамханаларда сабақ өткізуден қолы тимей жүрген жоқ па қасқалардың. 5-6 баланы жеткізген оңай ма, өзгені алдаса да, арбаса да ақша керек... Бұл - менің ойым.

***
Қазір толыққанды адам болуды байлықпен өлшейді. Сенің кісі санатына қосылғаның қыста қар жаумайтын жаққа барып теңіз жағалауында күнге қыздырынумен өлшенеді. Барлықтың шкаласы - Дубай, Египет сияқты елдерді аралап, түйе мініп қайту. Бұған Меккені қосуға болады. Сол себептен де шығар, қандай жолмен болса да байысам, содан кейін тек әлдебір тұрғын үй кешенінде ғана тұрсам немесе пәленнен қалмай қайтсем де пәлен қабатты жекежайда тұруым керек деген түсініктегі адам көбейді. Мейлі ғой, өмірге бір келгенде жақсы өмір сүру керек. Бірақ деймін де... Бірінен-бірі қалмай бай болудың жолында жарысқа түскендерге Жер шарын айналып жүрген басқа планетаның біріне үй салып, сонда тұра алмаған соң бәрі бекер ғой. Соны түсінбей жүргендері болмады. Шетінен ақылды немелер, қала мынау түтінге тұншыққан, өзге планетаның біріне қоныс аудару қалай ойына келмейді? Соған таңғалам...

Айгүл Болатханқызының әлеуметтік желідегі жазбасынан

Abai.kz