Мемлекет басшысы Қасым-Жомарт Тоқаев Қазақстандағы төтенше жағдайды ұзарту туралы Қаулыға қол қойды,- деп хабарлайды akorda.kz

«Қазақстан Республикасында төтенше жағдайды енгізу туралы» Қазақстан Республикасы Президентінің 2020 жылғы 15 наурыздағы № 285 Жарлығымен енгізілген Қазақстан Республикасының барлық аумағындағы төтенше жағдайдың қолданысы 2020 жылғы 1 мамырдағы 07 сағат 00 минутқа дейін ұзартылсын» делінген хабарламада.

Бұған дейін Президент карантин мерзімі сәуірдің аяғына дейін созылатыны туралы мәлімдеген болатын.

«Біз әлі коронавирус індетінің жаппай таралу шегінінен өткен жоқпыз. Эпидемия жағдайында бәсеңсуге болмайды. Сондықтан астана, Алматы мен Шымкент қалаларында және облыстарда карантин режимін сәуірдің соңына дейін ұзартуды тапсырамын.

Білемін, бұл шешім көпке ұнай қоймайды. Себебі, халық сыртқа шығып, бұрынғыдай қалыпты өмір сүргісі келеді. Бірақ, карантин ережесін сақтағаннан басқа амал жоқ. Бұл отандық және халықаралық вирусологтардың кеңесі", - деген болатын.

Айта кетейік, бүгінде соңғы мәлімет бойынша Қазақстанда коронавирус жұқтырғандар саны - 1179-ға жетті. 142 адам жазылып шығып, 14 адам қайтыс болған.

Abai.kz