Испания – АҚШ – 0:2 (0:1, 0:1)
Голдар: 0:1 – Алтидор (27), 0:2 – Демпси (74).

Испания – АҚШ – 0:2 (0:1, 0:1)
Голдар: 0:1 – Алтидор (27), 0:2 – Демпси (74).

Сәрсенбі күннің кеші Испания құрамасы үшін сәтсіз болды. Бапкерлік тізгін Дель Боскеге тапсырылғалы бері екінші тынысы ашылған Еуропа чемпиондарын қара құрлықтағы жарыстың жартылай финалында басқа басқа емес ортаңқол ұжымдардың бірінен саналатын АҚШ құрамасы тізе бүктірді. Қатарынан 35 матчта жеңіліс көрмеген Испания осы ойында сүрінбегенде әлемдік рекордқа өзгеріс енгізер еді. Бірақ дәл айтулы сәттің қарсаңында күтпеген жерден жеңіліп, кезінде тура осындай көрсеткішке ие болған Бразилиядан оза алмай қалды. Ал АҚШ құрамасының біраз биікті бағындыратынын Италиямен бәсекеден кейін-ақ айтқанбыз. Әлем чемпиондарын әбден састырған ұжым позициялық тұрғыда қате жібіріп қойып, ұтылған еді. Әйтпесе Боб Брэдли жаттықтыратын америкалықтардың сол кездесудегі қимылы көпті тамсандырған-ды. АҚШ қара құрлықтың алты дүркін чемпиондары – Мысырды ойсырата ұтқанда кейбіреулер оны кездейсоқтыққа балады. «АҚШ жеңген жоқ, Мысыр жеңілді» деп пәлсапалық ой айтқандар да табылды. Бірақ бұл құраманың ойынын мұқият тамашалаған жан оның қате пікір екеніне оңай көз жеткізер еді. Америкалықтар ойын тактикасын ұтымды ұйымдастыру арқылы көп мәселені шеше біледі. Ал бапкер нұсқаулығын орындауда бұл ұжымның дене дайындығы жоғары ойыншылары өзгелерге үлгі көрсетті деуге болады. Мұны бас бапкер Брэдлидің өзі де растады. БАҚ өкілдеріне сұхбатында ол бірінші кезекте шәкірттеріне алғысын айтып, өз командасының әсіресе жартылай қорғаныста тамаша ойнағанын тілге тиек етті. Оның пікірінше, америкалықтар испан жартылай қорғаушысы Хавиді тұсап тастаған. Соның кесірінен ол шабуыл шебіндегі әріптестеріне жеткілікті көмектесе алмаған.
Қалай болғанда да, испандықтар енді тек үшінші орынға ғана таласады. Финалдық жұпты құрайтын екінші команда кеше түнде ОАР – Бразилия кездесуінде анықталды. Ғажайыпқа толы қара құрлықтағы жарыста күтпеген нәтижелер жиі тіркелуде. Сол себепті финалда Бразилия өнер көрсетеді деп нық сеніммен ешкім де айта алмайтын шығар.