يسپانيا – اقش – 0:2 (0:1, 0:1)
گولدار: 0:1 – التيدور (27), 0:2 – دەمپسي (74).

يسپانيا – اقش – 0:2 (0:1, 0:1)
گولدار: 0:1 – التيدور (27), 0:2 – دەمپسي (74).

سارسەنبى كۇننىڭ كەشى يسپانيا قۇراماسى ءۇشىن ءساتسىز بولدى. باپكەرلىك تىزگىن دەل بوسكەگە تاپسىرىلعالى بەرى ەكىنشى تىنىسى اشىلعان ەۋروپا چەمپيوندارىن قارا قۇرلىقتاعى جارىستىڭ جارتىلاي فينالىندا باسقا باسقا ەمەس ورتاڭقول ۇجىمداردىڭ بىرىنەن سانالاتىن اقش قۇراماسى تىزە بۇكتىردى. قاتارىنان 35 ماتچتا جەڭىلىس كورمەگەن يسپانيا وسى ويىندا سۇرىنبەگەندە الەمدىك رەكوردقا وزگەرىس ەنگىزەر ەدى. بىراق ءدال ايتۋلى ءساتتىڭ قارساڭىندا كۇتپەگەن جەردەن جەڭىلىپ، كەزىندە تۋرا وسىنداي كورسەتكىشكە يە بولعان برازيليادان وزا الماي قالدى. ال اقش قۇراماسىنىڭ ءبىراز بيىكتى باعىندىراتىنىن يتاليامەن باسەكەدەن كەيىن-اق ايتقانبىز. الەم چەمپيوندارىن ابدەن ساستىرعان ۇجىم پوزيتسيالىق تۇرعىدا قاتە ءجىبىرىپ قويىپ، ۇتىلعان ەدى. ايتپەسە بوب برەدلي جاتتىقتىراتىن امەريكالىقتاردىڭ سول كەزدەسۋدەگى قيمىلى كوپتى تامساندىرعان-دى. اقش قارا قۇرلىقتىڭ التى دۇركىن چەمپيوندارى – مىسىردى ويسىراتا ۇتقاندا كەيبىرەۋلەر ونى كەزدەيسوقتىققا بالادى. «اقش جەڭگەن جوق، مىسىر جەڭىلدى» دەپ پالساپالىق وي ايتقاندار دا تابىلدى. بىراق بۇل قۇرامانىڭ ويىنىن مۇقيات تاماشالاعان جان ونىڭ قاتە پىكىر ەكەنىنە وڭاي كوز جەتكىزەر ەدى. امەريكالىقتار ويىن تاكتيكاسىن ۇتىمدى ۇيىمداستىرۋ ارقىلى كوپ ماسەلەنى شەشە بىلەدى. ال باپكەر نۇسقاۋلىعىن ورىنداۋدا بۇل ۇجىمنىڭ دەنە دايىندىعى جوعارى ويىنشىلارى وزگەلەرگە ۇلگى كورسەتتى دەۋگە بولادى. مۇنى باس باپكەر برەدليدىڭ ءوزى دە راستادى. باق وكىلدەرىنە سۇحباتىندا ول ءبىرىنشى كەزەكتە شاكىرتتەرىنە العىسىن ايتىپ، ءوز كومانداسىنىڭ اسىرەسە جارتىلاي قورعانىستا تاماشا ويناعانىن تىلگە تيەك ەتتى. ونىڭ پىكىرىنشە، امەريكالىقتار يسپان جارتىلاي قورعاۋشىسى ءحاۆيدى تۇساپ تاستاعان. سونىڭ كەسىرىنەن ول شابۋىل شەبىندەگى ارىپتەستەرىنە جەتكىلىكتى كومەكتەسە الماعان.
قالاي بولعاندا دا، يسپاندىقتار ەندى تەك ءۇشىنشى ورىنعا عانا تالاسادى. فينالدىق جۇپتى قۇرايتىن ەكىنشى كوماندا كەشە تۇندە وار – برازيليا كەزدەسۋىندە انىقتالدى. عاجايىپقا تولى قارا قۇرلىقتاعى جارىستا كۇتپەگەن ناتيجەلەر ءجيى تىركەلۋدە. سول سەبەپتى فينالدا برازيليا ونەر كورسەتەدى دەپ نىق سەنىممەن ەشكىم دە ايتا المايتىن شىعار.