Қазақстан денсаулық сақтау министрлігі коронавирус инфекциясына байланысты эпидемиологиялық жағдай жөнінде жаңа болжамын жариялады.

Бүгін, 24 тамызда Нұр-Сұлтанда үкімет жиынында сөйлеген денсаулық сақтау министрі Алексей Цой "пессимистік сценарий бойынша" қыркүйек айында тәулігіне орта есеппен 6 300 адам жұқтырады, қазан айында бұл көрсеткіш 2400-ге түседі" деді.

Ал "оптимистік сценарий бойынша" қыркүйекте тәулігіне орта есеппен 4200, қазан айында 1300 адам жұқтыруы мүмкін".

Алексей Цойдың сөзінше, кейінгі екі тәулікте коронавирус жұқтырғандардың 10 пайызға азайғаны байқалған.

Министрдің айтуынша, кейінгі екі аптада ауруханалардағы инфекциялық төсектерге жатқызылатындар 12 пайызға азайған.

"Инфекция төсектерінің 49 пайызы, реанимация төсектерінің 46 пайызы бос емес. Бұл көрсеткіш Ақтөбе облысында 68 пайыз, Алматы қаласында 61 пайыз, Алматы облысында 59 пайыз болып тұр" деді министр Алексей Цой.

Бұған дейін денсаумин өткен тәулікте 5,6 мың адамның коронавирус жұқтырғаны анықталды деп хабарлаған еді. Шілдеден бері күн сайын жеті мыңнан астам адам жұқтырып келген болатын.

Денсаумин мәліметінен кейін үкімет Ashyq жобасыа қатысатын бизнес субъектілеріне демалыс күндерге қойылған шектеу шараларын азайту мәселесін қарастыруды тапсырды. Бүгінде Түркістан облысынан өзге барлық аймақ "қызыл аймақта" тұр.

Дереккөз: Centralasian

Abai.kz