2021 жылдың қорытындысы бойынша "ҚазМұнайГаз" Басқарма мүшелеріне берілген сыйақы мөлшері 228 млн теңге, ал, Директорлар кеңесі мүшелерінің сыйақысы - 181 млн теңгені құрады.

Бұл туралы "ҚазМұнайГаз" ҰК " АҚ Басқарма төрағасының орынбасары Дәурен Қарабаев мәлімдеді. Ол әр адамның қанша алатыны туралы ақпарат жеке дерек болып саналғандықтан, оны жариялай алмайтынын айтқан.

ҚМГ Басқарма құрамына бес адам кіреді: Басқарма Төрағасы Мағзұм Мырзағалиев, басқарма төрағасының экономика және қаржы жөніндегі орынбасары Дәурен Қарабаев, төрағаның стратегия, инвестициялар және бизнесті дамыту жөніндегі орынбасары Дастан Абдулғафаров, төрағаның барлау және өндіру жөніндегі орынбасары Құрманғазы Есқазиев және төрағаның ірі мұнай-газ жобалары жөніндегі орынбасары Мұрат Мұнбаев.

Ұлттық компанияның директорлар кеңесі жеті адамнан тұрады: «ҚазМұнайГаз» ҰК АҚ Директорлар кеңесінің төрағасы, тәуелсіз директор Уолтон Кристофер Джон, "Самұрық-Қазына" АҚ мүдделерінің өкілі Ұзақбай Қарабалин, қоғаммен байланыс және өзгерістерді басқару жөніндегі басқарушы директоры Ғибрат Ауғанов, тәуелсіз директор Миллер Тимоти Глен және басқа мүшелері Мағзұм Мырзағалиев, Ернар Жанәділ, Филип Холланд.

Бұған дейін "ҚазМұнайГаз" 1 трлн таза кірісті өз қалауы бойынша жұмсайтынын айтқан еді.

Abai.kz