Ресей СІМ Ақпарат және баспасөз департаменті директорының орынбасары Иван Нечаев Қазақстан мектептерінде орыс сыныптарын жабу жоспарланып отыр деген жаңалыққа пікір білдірді.

"Қазақстан мектептердегі орыс сыныптарын алты-жеті жылда жабуы мүмкін деген ресейлік және қазақстандық БАҚ-та пайда болған ақпаратқа қалай түсініктеме бере аласыз?" - деген сұрақ қойылды.

Бұған Иван Нечаев: "15 тамыз күні ресми қазақстандық Stopfake.kz порталы бұл сыбысты жоққа шығарды. Қазір әлеуметтік желілерде белсенді түрде жарияланып, " Қазақстандағы орыс мектептерінің болашағы жоқ па?" деген жаңалық екі жыл бұрын эфирге шыққан. Онда орта білім беру саласындағы үрдістер, оның ішінде республиканың орыс тілді мектептеріндегі оқушылар санының азаюы талқыланды", - деп жауап берді.

"Ел басшылығының орыс тілді сыныптардан бас тарту жоспары туралы айтатын болсақ, бұл туралы Қазақстан Республикасының білім және ғылым вице-министрі Шолпан Каринова түсініктеме берді. Атап айтқанда, ол ақпараттың шындыққа жанаспайтынын және қазақ пен орыс  тілінде оқытатын сыныптарда орыс тілі бұрынғы режимде оқытылып жатқанын, басқа жоспарлар жоғын айтқан болатын", - деп қосты Нечаев.

Нечаев ресми деректер бойынша, 2022 жылы Қазақстанда орыс тілінде оқытатын 1 160 мектеп (16,6%); қазақ және орыс тілдерінде оқытатын 2047 мектеп (29,4%) жұмыс істейтінін атады.  Қазақстанда орыс тілінде оқитындардың үлесі 30,9% - ды құрайды. Сонымен қатар, орыс тілі пән ретінде барлық мектептерде оқытылады.

"Сонымен қатар, әлеуметтік желілер мен БАҚ-та Ресей – Қазақстан ынтымақтастығына қатысты "фейктердің" күрт артуына назар аударды. Оларды артында Ресей мен Қазақстанды араздастыру, сондай-ақ Қазақстанның көпұлтты қоғамының ішінде шиеленіс болғанын қалайтындар тұрғанын жоққа шығармаймыз", - деп түйіндеді Иван Нечаев.

Abai.kz