Күріштің арқасында күрмек су ішіпті демекші, су тасқынының алдын алуға арналған құм толы қапшықты ұрлаушылар да табылды. Қазіргі таңда бес адамның үстінен қылмыстық іс қозғалды. Бұл туралы Abai.kz хабарлайды.

Қалалық полиция қызметкерлерінің хабарлауынша, 18 сәуір күні сағат 21:00 шамасында Атырау қаласында Жайық өзенінің бойына құм толы қапшықтардан тұрғызылған бөгетті бұзып,  қапшықтарды ұрлаған адамдар анықталды.

"Атырау қаласындағы Жайық жағалуында тасқын судың алдын алу мақсатында дайындалған бөгеттерден құм толтырылған қапшықтарды ашық түрде жымқырғандар анықталып ұсталды. 42, 32, 37, 38 жастағы ер адамдар мен 34 жастағы әйел адам алдын ала ақылдасып құм толы қапшықтарды өз тұрғын үйлерінің қоршауына көлікке тиеп тасыған", – делінген Атырау қалалық полициясының хабарламасында. 

Abai.kz