Оқу-ағарту министрлігінің баспасөз қызметі хабарлауынша, су тасқыны болған өңірлердегі 3883 бала сауықтыру орталықтарында тегін демалады.

Жазғы демалыспен, сауықтырумен және еңбекпен 1-10 сынып оқушыларының 92%-ы, яғни әлеуметтік осал санаттағы 600 мыңға жуық баланы қоса алғанда, барлығы шамамен 2,9 млн бала қамтылады.

"Демалыс орындарында балалардың қауіпсіздігі ерекше бақылауда. 187 демалыс орталығының 150-і 1-10 маусым аралығында іске қосылуда. Ал қалған 37 демалыс нысаны өз жұмысын 15 маусымнан бастайды", – делінген министрліктің ресми хабарламасында. 

Жазғы демалысқа тегін жолдамаларды:

• атаулы әлеуметтік көмек (АӘК) алуға құқығы бар отбасылардың балалары;
• жан басына шаққандағы орташа табысы ең төменгі күнкөріс деңгейінен төмен АӘК алмайтын отбасы балалары;
• жетім, ата-анасының қамқорлығынсыз қалған балалар;
• төтенше жағдайлар салдарынан жедел көмек қажет ететін отбасы балалары;
• өзге де санаттағы мемлекеттік білім беру мекемелерінің білім алушылары мен тәрбиеленушілері ала алады.

Қажетті құжаттарды тапсырады:

Офлайн: облыстардың, Астана, Алматы және Шымкент қаласының білім басқармаларына, аудандардың, облыстық маңызы бар қалалардың білім бөлімдеріне, білім беру ұйымдарына; ХҚКО-ға.

Онлайн: eGov порталы арқылы, ЭЦҚ болуы қажет.

Abai.kz