Мемлекет басшысы Қасым-Жомарт Тоқаев Қарулы Күштері Құрлық әскерлерінің және «Оңтүстік» өңірлік қолбасшылығы әскерлерінің қобасшыларын тағайындады, деп хабарлады Ақорда.

Сонымен, қандай ауыс-түйістер жасалды? Қараңыз:

1) Асан Қуанышұлы Жүсіпов Қазақстан Республикасының Қарулы Күштері Құрлық әскерлерінің бас қолбасшысы лауазымынан босатылды.

2) Қуанышбек Өскенбайұлы Үштаев «Оңтүстік» өңірлік қолбасшылығы әскерлерінің қолбасшысы лауазымынан босатылды.

3) Мереке Мәтімұлы Көшекбаев Қазақстан Республикасының Қарулы Күштері Құрлық әскерлерінің бас қолбасшысы лауазымына тағайындалды.

4) Генерал-майор Ержан Ибраев «Оңтүстік» өңірлік қолбасшылығы әскерлерінің қолбасшысы болып тағайындалды.

Ержан Уақасұлы Ибраев кім?

Генерал-майор Ержан Уақасұлы Ибраев бұған дейін «Астана» өңірлік қолбасшылығы әскерлерін басқарған. Генерал-майор Ержан Ибраев взвод командирінен бастап, «Астана» өңірлік қолбасшылығы әскерлерінің қолбасшысына дейінгі мансаптық жолдан өтті.

1995 жылы Алматы жоғары жалпы әскери командалық училищесін, 2009 жылы Ұлттық қорғаныс университетін, 2020 жылы РФ ҚК Бас штабының Әскери академиясын «Ұлттық қауіпсіздік және мемлекеттің қорғанысы» мамандығы бойынша бітірген. Үйленген, 3 бала тәрбиелеп отыр.

Мереке Мәтімұлы Көшекбаев кім?

Ал генерал-майор Мереке Мәтімұлы Көшекбаев бұған дейін Бас штаб бастығы – ҚР ҚК Құрлық әскерлері бас қолбасшысының бірінші орынбасары болды.

Генерал-майор Мереке Көшекбаев әскери училище курсантынан бастап Құрлық әскерлері қолбасшысының бірінші орынбасарына дейінгі мансаптық жолдан өтті. Ол әр жылдары жауынгерлік дайындық бойынша жауапты қызметтер атқарды. Бірнеше әскери бөлімдердің командирі, ҚР Қарулы күштері Құрлық әскерлері Десанттық-шабуылдау әскерлерінің, «Оңтүстік» өңірлік қолбасшылығының қолбасшысы болды. 1997 жылы Алматы жоғары жалпыәскери командалық училищесін, 2007 жылы Ұлттық қорғаныс университетін, 2019 жылы РФ ҚК Бас штабының Әскери академиясын бітірген.

II дәрежелі «Данқ», II дәрежелі «Айбын» ордендерімен, ведомстволық наградалармен және мерейтойлық медальдармен марапатталған.

Abai.kz