2025 жылы Ұлы Отан соғысының басталғанына 80 жыл толып отыр. Бұл — тарихтың зұлмат жылдарын, миллиондаған адамның жанқиярлық ерлігін, халқымыздың теңдессіз төзімі мен қаһармандығын еске алатын ерекше кезең.

"Ешкім де, ешнәрсе де ұмытылмайды" деген ұран — тек сөз емес, ол ұрпақтар жадына мәңгілік қашалған қасиетті аманат. Ұлы Отан соғысы 1941 жылдың 22 маусымында басталды. Бұл күні фашистік Германия Кеңес Одағына тұтқиылдан шабуыл жасап, бүкіл халықтың тағдыры күрт өзгерді. Қазақ жерінен 1,2 миллионнан астам адам майданға аттанды. Олардың қатарында қайсар жауынгерлер, ару қыздар мен ерен еңбектің шеберлері болды. Майдан даласында қан төгіп, тылда қажырлы еңбек еткен әрбір жанның ерлігі — бүгінгі бейбіт өміріміздің негізі.

Қазақстандық батырлар — Бауыржан Момышұлы, Әлия Молдағұлова, Мәншүк Мәметова, Талғат Бигелдинов сынды ержүрек тұлғалар бүкіл әлемге қазақ халқының қаһармандық рухын паш етті. Біздің елдің майданға қару-жарақ пен азық-түлік жеткізіп, жеңіске үлес қосқаны да тарихта алтын әріптермен жазылды.

Бүгінгі ұрпақ үшін соғыстың қасіретті сабағы — бейбіт өмірдің қадірін түсіну, елге қызмет етудің қасиетті парыз екенін ұғыну. 80 жылдық тағзым — өткеннің ерлігін ұмытпай, әрдайым жүрек түкпірінде сақтап, болашаққа бейбіт өмірді аманат етуге шақырады. Әр жылдың 9 мамырында ел көлемінде ескерткіштерге гүл шоқтарын қою рәсімдері, ардагерлерге құрмет көрсету — барлығы да осы ұлы ерлікті ұлықтаудың көрінісі. Елімізде жасалып жатқан әрбір тағзым рәсімі — өткенге деген құрмет пен болашаққа сенімнің жарқын көрінісі. Біз, ұрпақтары, сол сұрапыл жылдардың жауынгерлеріне, тылдағы еңбек майталмандарына бас иеміз. Олардың жасаған ерлігі мәңгі жадымызда қалады. Ұлы Отан соғысының 80 жылдығы — тек өткенді еске алу емес, ол — ерлік пен бірліктің ұлы сабағы. Біз бүгінгі бейбіт өміріміз үшін жанын қиған боздақтардың алдында мәңгі қарыздармыз. Олардың батырлығы — біздің жүрегімізде, тарихымызда, болашағымызда.Бүгінгі ұрпақ бейбіт аспан мен тыныш өмірдің қадірін біліп, ата-баба аманатын көздің қарашығындай қорғауы тиіс.

"Ешкім де, ешнәрсе де ұмытылмайды" деген ұлы ұран — ұлттың рухын сақтайтын, ұрпақты ұлы мақсаттарға жетелейтін мәңгілік үндеу.

Бағлан Ташимов

Abai.kz