Бүгін – 11 мамыр, мамыр айының екінші жексенбісі, елімізде ең мейірімге толы, ең жүрекке жақын мерекелердің бірі — Аналар күні аталып өтуде. Осыған орай Алматы қаласының жастары «Анаға тағзым – Анаға құрмет» атты онлайн-челленджді бастап, әлеуметтік желілерде шынайы алғыс пен ыстық ықыластарын білдіріп жатыр. 

Аталған челлендж ананың мейірімі мен махаббатына, төзімі мен даналығына деген алғыстың көрінісіне айналды. Қатысушылар қысқа Reels/TikTok видеоларды, архивтік фотосуреттер мен стористерді жариялап, анасының өмір жолындағы рөлін, қиын сәттерде демеу болғанын, өмірлік бағыт сілтегенін еске алуда. Көпшілік анадан алған тәлім-тәрбиенің – өзін-өзі дамыту, өзгеге көмектесу, мойымау секілді құндылықтардың – бүгінгі өміріне үлкен әсер еткенін атап өтуде. 

Посттар #AlgysAnama #SpasiboMame #AnagaQurmet #ДеньМатери мынадай хэштегтермен жарияланып,
бұл ортақ хэштегтер аналарға арналған мыңдаған жүрекжарды жазбаларды бір арнаға тоғыстырып отыр. 

Челленджге белгілі блогерлер, әртістер, спортшылар мен қоғам қайраткерлері белсене қатысып, акцияның мән-маңызын арттырды. Олар жастарды аналарды тек бір күнде ғана емес, күн сайын қадірлеуге, құрмет көрсетуге шақырды. 

«Анам – менің ішкі бағдаршамым. Қиын сәттерде айтқан сөздері әлі күнге дейін санамда жаңғырып тұрады. Бүгінгі жетістіктерім – соның нәтижесі», – дейді челленджге қатысушы жас кәсіпкер Нұрбек Серикбаев.

«Анаға тағзым – Анаға құрмет» — жай ғана онлайн-акция емес. Бұл – ұрпақтар арасын жалғайтын, қоғамның рухани іргетасын қалыптастыратын шынайы бастама. Жылдам өзгеріп жатқан цифрлық заманда осындай жүректен шыққан шаралар адамды өз түп-тамырына, адами құндылықтарға қайта бет бұрғызады. 

«Оқуға түсе алмай, бар үмітім үзіліп, өмірге ренжіп жүргенде, анам: «Сенің кезегің келеді» деп сенім сыйлады. Қазір мен грантпен оқып жүрмін және сол кезде айтқан анамның сөздерінің қандай маңызды болғанын түсіндім», – дейді студент Аружан Канапиянова.

Алматы жастары осы ерекше күні анаңызға деген алғысыңызды білдіріп, жүрекжарды естеліктеріңізбен бөлісіп, челленджге қосылуға шақырады. 

Abai.kz