Экс-президент Назарбаевтың жұбайы Сара Алпысқызы төңірегіндегі белгісіздік пен құпия қоюланып келеді.

Оның қайтыс болғаны туралы ақпаратты әулет өкілдері лезде жоққа шығарған еді. Алайда ел арасында "Сара өмірден көшіп кетті..." деген қауесет желдей есіп тұр.  

Жаңа Қазақстан Сара апаның қайтыс болғанын жасырудың негізгі себептеріне үңіліп көрді:  

Біріншіден, Назарбаев әулетінің қазіргі билікпен қарым-қатынасы әлі толық тұрақтанбаған. Тоқаев билігі Назарбаев отбасына тиесілі активтерді мемлекетке қайтару, әулеттің саяси ықпалын шектеу процесін бастағаны белгілі.  

Осындай кезде Сара Қонақаеваның өлімі туралы ақпарат, отбасының саяси әлсіздігін көрсетіп, биліктің әрекеттерін тездетуі мүмкін. Сондықтан Назарбаев әулеті өздерінің саяси позициясын нығайтып, билікпен келіссөз жүргізіп, өз активтерін қорғау үшін уақыт ұтып отыр. 

Екіншіден, Сара Қонақаева тек Назарбаевтың әйелі ғана емес, отбасындағы моральдық авторитет ретінде танылған тұлға. Оның өлімі Назарбаевтың отбасылық және моральдық имиджіне ауыр соққы. 

Ел арасында Назарбаевтың жеке өмірі, екінші отбасы туралы айтылып жүрген әңгімелер кейінгі кезде толық расталған. Сара Алпысқызының қайтыс болуы бұл тақырыпты қайта қозғап, бұрынғы президенттің қоғамдық беделін біржола құлдыратуы мүмкін. 

Үшіншіден, отбасылық мүлік пен қаржы активтері мәселесі бар. Авторитарлы мемлекеттерде саяси лидердің немесе оның жұбайының өлімінен кейін активтерді бөлу процесі өте күрделі әрі шиеленіскен жағдайда өтеді.  

Сара Алпысқызының атына рәсімделген қорлар, жылжымайтын мүліктер, түрлі қаржылық активтердің болашағын отбасылық келісіммен шешіп алмай, оның қайтыс болғанын жариялау, бұл активтердің мемлекет бақылауына өтіп кетуіне әкелуі мүмкін.  

Сондықтан отбасы мұндай күрделі қаржылық мәселелерді қоғам назарынан тыс шешіп алуға тырысуда. 

Қорыта айтқанда, авторитарлы мемлекеттерде осындай саяси сезімтал ақпараттарды уақытша жасыру қалыпты құбылыс. Назарбаев әулеті де дәл осы классикалық авторитарлық тактиканы қолданып отыр.  

Сара Алпысқызының өлімін уақытша жасыру арқылы олар билік пен қоғамдағы өз позициясын сақтап қалуға, ішкі және сыртқы қауіп-қатерлерден қорғануға, саяси-қаржылық мүдделерін қорғап қалуға талпыныс жасауда. 

Қазақстан халқының Сара Алпысқызына көзқарасы жаман емес. Ол кісі тәуелсіздіктің алғашқы 5-7 жылында ғана тұңғыш президенттің қасында болды. Бизнеске, таққа араласпады. Қайырымдылықпен айналысты. Нұрсұлтан Назарбаевпен 2005-2010 жылдар аралығында ресми ажырасып, артынан өзінің Қонақаева тегіне қайта оралды.  

Дереккөзі: Жаңа Қазақстан 

Abai.kz