Өкінішке орай бүгінгі Ресейде тегі орыс әрбір азаматтың санасы имперлік дертпен уланған. Бұл туралы Mezgil.kz ақпараттық порталы жазды. 

Әсіресе, пост-кеңестік кеңістік азаматтарын, соның ішінде ОА-лық еңбек мигранттарын екінші сортты адамдар санау қалыпты әдетке айналғаны жасырын емес.

Мұның бір ғана себебі бар. Ол – «әлем Ресейге қарсы» деген кереғар саяси ұстанымды Кремль билігі жылдар бойы Ресейдегі орыстар мен орыс тілділердің бойына жақсылап сіңіріп келеді. Соның нақты мысалы – жақында әлеуметтік желіде кең тараған «Сен – құлсың» атты бейнебаян.

Бұл видео Мәскеу маңындағы Химки қаласында түсірілген. «Солнечная система» тұрғын үй кешенінде жергілікті тұрғын Сергей деген орыс азаматы мен ұлты өзбек такси жүргізушісі Әлішердің арасында дау шығып, оның соңы ашық агрессияға, нәсілдік қорлауға ұласқан.

Оқиғадан неден басталған десеңіз: Сергей өз көлігіне орын таппай, таксистен орын босатуды талап етеді. Жүргізуші өзбек жігіт «тапсырыс күтіп тұрғанын» айтқанымен, әңгіме бірден жанжалға ұласады. Ақыры орыс жігіт ашуға булығын, ауызынан ақ ит кіріп, көк ит шығады. Өзбек жігітті: «Сен – құлсың, орыстардың құлысың!» деп қорлайды.

Жергілікті тұрғындар полиция келгенше Сергейді қолдап шыққан. Ал таксист Әлішер енді сол аумақтан тапсырыс қабылдамауға мәжбүр.

Өзбекстанның Сыртқы істер министрлігі «шетелдегі азаматтарды қорғау мемлекеттік саясаттың маңызды бағыты болып табылатынын және мемлекеттің өз азаматтары алдындағы міндеттемелері негізінде жүзеге асырылатынын» атап өтті.

«Шетелде азаматтардың құқықтары, бостандықтары, заңды мүдделері немесе қадiр-қасиетiне нұқсан келтiрiлсе, олар дереу біздің мемлекеттiң құзыреттi құқық қорғау органдарына хабарласуы қажет. Сонымен қатар, азаматтар Өзбекстанның дипломатиялық өкілдіктерінен немесе консулдық мекемелерінен құқықтық және консулдық көмек сұрай алады. Өзбекстан азаматтары орналасқан жеріне қарамастан өз елінің қорғауында», - деді Өзбекстан СІМ-і.

Бұл — Ресей қоғамындағы нағыз шындықтың көрінісі: «сырттан келгендерді» басыну қалыпты құбылыс саналады. Путин режимі елді толықтай фашистік, нәсілшіл бағытқа бұрып жіберді. Өзгелерді құл санау – орыс ұлтының артықшылығын дәріптейтін ресми идеологияның салдары.

Сондықтан «Сен – құлсың» бейнебаяны тек бір аулада болған ұрыс емес, тұтас Ресей қоғамындағы қауіпті дерттің дәлелі. Бұл дерттің аты – фашизм.

Бұл оқиға бір ғана Әлішердің басындағы жағдай емес. Ресейде жұмыс істеп жүрген миллиондаған Орталық Азиялық еңбек мигранттарының күнделікті көріп жүрген бейнеті. Көшеде де, жұмыста да, тұрмыстық ортада да оларды төмендету қалыпты жағдайға айналған.

Біз Mezgil.kzақпараттық порталында осыған дейін Ресейдегі ОА-лық еңбек мигранттарының жай-күйі туралы жазған едік:

Бірінші мақала – ОА Ресейге өкпелі: Мәскеу мен Ташкент арасындағы дипломатиялық жанжал ушықты...

Екінші мақала – Садырдың хаты һәм Путиннің жауабы: Ресей ОА мигранттарына құлша қарайды...

Abai.kz