ПУТИН АСАДПЕН КЕЗДЕСТІ
Сейсенбі, кешке Мәскеуде Ресей президенті Владимир Путин мен Сирия президенті Башар Асад келіссөз жүргізді. Путиннің баспасөз хатшысы Дмитрий Песков Асадтың Мәскеуге жұмыс сапарымен келгенін хабарлады.
Президенттердің жеке кездесулерінен кейін, Ресейдің жоғарғы билік өкілдерінің қатысуымен кеңейтілген құрамда келіссөздер болған.
Дмитрий Песков мәлімдегендей, Асад Путинге Сириядағы ахуал туралы баяндап, болашақтағы жоспарларымен бөліскен. Кездесу барысында ресейліктердің Сириядағы әскери операциясы, террормен күресу, екі жақты қарым-қатынастың түрлі бағыттары талқыланған.
Қыркүйектің соңғы күндері Ресей Сирияда әскери-әуе операциясын бастаған еді. Кремль мұны «Ислам мемлекеті» террорлық тобының содырларына қарсы қимыл деп түсіндіреді. Алайда, Сирияда терроршыларға қарсы әскери операция жүргізіп жатқан Вашингтон Мәскеудің әуе соққысының басым бөлігі Башар Асад режимімен күресіп жатқан сириялық оппозиция күштеріне қарсы бағытталған деп отыр.
Ал, АҚШ аяқ астынан Мәскеуге Ресей президенті Владимир Путинмен кездесуге келген Сирия президенті Башар Асадты қызыл кілем төсеп күтіп алған Кремль әрекетін қатаң сынға алды.
"Біз өз халқына химиялық қару қолданған Асадты қабылдау кезінде қызыл кілем төсеп күтіп алған Ресейдің онымен бірге Сирияға қатысты мәлімдеме жасауын қабылдай алмаймыз",- деді Ақ үйдің ресми өкілі Эрик Шульц журналистерге берген сұхбатында.
Абай-ақпарат
