Бүгін, 17 наурыз жұмыс күнінің соңғы сағаттарында Түркия президенті Режеп Тайип Ердоған Ресей президенті Путинмен телефон арқылы сөйлесті.

Түркия президентінің ақпараттық дереккөздеріне сүйеніп жазған www.radikal.com.tr хабарына сай, екі ел президенті Украина мәселесін талқылаған. Әріптестікті одан ары дамыта түсуге ниетті екенін білдірген Ердоған мен Путин Украинадағы экономикалық дағдарысты, әскери қақтығыстарды, сонымен қатар Ресей мен Түркия арасында жоғары дәрежелі энергетикалық қатынас орнатуды да сөз еткен. Әңгіме барысында екі ел президенті Қырым татарларына байланысты өзекті мәселелер мен оларды шешу жолдарын да қарастырған.

Олар телефон арқылы әңгімесінде Түркия президенті Ердоғанның Украинаға 20 наурызға жоспарланған іссапары аясында талқыланатын тақырыптарға да тоқталып өтті. Онда 1915 жылғы даулы мәселелер де  қаралатыны (1915 жылғы Осман империясы мен армян халқы арасындағы салқындық) айтылды. Ердоған ұмытылмас тарихқа әділ бағасын беріп, шынайы құрмет көрсететінін айтқан,  алайда Арменияның татуластық шақыртуларына Түркияның мән бермейтінін, сонымен қатар ортақ тарих комиссиясын құру ұсыныстарына  оң қабақ танытпайтын  позициясын да білдіре кеткен.

Екі лидер арасындағы телефон арқылы әңгіме жарты сағатқа созылған.

Нұрғали НҰРТАЙ

Abai.kz