Ертең, 16 қараша күні Жазушылар одағында жазушы Дәурен Қуаттың «Бөрісоқпақ» және ақын Әлібек Шегебайдың «Ақ жауын»  атты кітаптарының тұсаукесері өтеді.

М. Қашқари атындағы және Ғ. Мүсірепов атындағы сыйлықтардың лауреаты, «Қазақ әдебиеті» газетінің бас редакторы Дәурен Қуаттың бұған дейін «Әлқисса» атты прозалық кітабы жарық көрген. Ертең тұсауы кесілетін «Бөрісоқпақ» кітабына оқырман қауымға жақсы таныс "Тас монша", "Кірекей-Күнекей", "Мүйіз тарақ" сынды әңгімелерімен қатар әлі көп ешкімнің көзіне түспеген соны шығармары еніп отыр.

Ал «Шабыт» фестивалінің лауреаты, «Қазақ әдебиеті» газетінің жауапты хатшысы Әлібек Шегебай бұған дейін оқырмандарына «Алакеуім», «Әйнекке түскен сәуле» қатарлы жыр жинақтарын ұсынған.

Кешті Жазушылар одағы төрағасының орынбасары, ақын Бақыт Беделхан жүргізеді. Еркін Шүкіман, Ерлан Төлеутай, Ершат Қайырхан сынды сал-серілер әннен құттықтау жолдайды. Ең қызығы, кеш иелері де бірі домбырамен, бірі гитарамен ән шырқайды.

 Өтетін жері: Жазушылар одағы

Алматы қаласы, Абылай хан даңғылы, 105,

Басталуы: сағат 16:00

Abai.kz