Кришнаиттар керуені
Күні кеше тұрақты оқырмандарымыздың бірі Алматыдағы «Көк базардың» маңында әлем-жәлем киініп, қаланы басына көшіре даңғырлатып, айғайдан аумайтын әндерін айтып, маңып бара жатқан кришнаиттердің керуені түсірілген видеосын жолдапты.
Біз бір Алланың жолын қырық түрлі мәзхабқа бөліп, ары тартта, бері тарт қылып, қырық пышақ болып қырқысып жүргенде бізге үш қайнаса сорпаса қосылмайтын кришнаиттер алшаңдай басып, ағымын уағыздап әндетіп көшеде жүр. Оларға «қой дейтін қожа, әй дейтін әже» көрінбейді. Тіпті, «Көк базардың» төңірегінде күнелтіп жүрген ұсақ саудагер кемпір-шал, қатын-қалашқа қырғидай тиетін полицейлердің кришнаиттердің жолына кесе көлденең тұрғанын көре алмадық. Кришнаиттер керуен тартып барады.
«Абай-ақпарат»
