АҚШ мемлекеттік хатшысы Майк Помпеоның мәлімдемесінде президент Дональд Трамптың Түркияның кез келген мемлекеттік мекемелеріне және операцияға қатысы бар жеке тұлғаларға санкция салу жөнінде бұйрыққа қол қойғаны айтылады.
Санкция тізімінде Түркияның энергетика және қорғаныс, ішкі істер министрлігі бар.
Помпеоның мәлімдемесінде Түркияның күрдтерге қарсы операциясы аймақтағы бейбіт тұрғындар өмірінен қауіп келтіріп жатқаны айтылған. Сонымен бірге Түркиядан шабуылды тез арада тоқтатуды талап етеді.
АҚШ президенті твиттер парақшасына Сириядан америкалық әскерді тез арада алып кету қажеттігін тағы жазды.
Түркия болса шекарасын террористерден тазалау мақсатында әскери операция жасап жатырмыз дейді.
Дүйсенбі күні Дамаскіде Сирия үкіметі мен күрдтер арасында келіссөз жүргені белгілі болды. Сирия үкіметі елдің солтүстігіне түрік шабуылына қарсы тұру үшін әскерін жіберуге бұйрық берді.
Abai.kz
