"Масанчи, Бұлар батыр, Ауқатты және Қарасу ауылдарында жалпы саны 40 тұрғын үй, 20 коммерциялық нысан, бес шаруашылық ғимарат өртенген. Барлық жұмыстар "Шивон" қайырымдылық қорының есебінен жүргізіледі" деді әкімдік өкілдері.

Әкімдік дерегінше, үйі өртенген 39 отбасының үйін қалпына келтіру үшін облыстық бюджеттен шамамен 20,6 млн теңге қаржы бөлінген. Бұған қоса, мемлекеттік материалдық қоры құрылысшыларды бірқатар құрылыс материалдармен қамтамасыз етеді.

Тоғыз отбасына асыраушысынан айырылуына байланысты 8,2 млн теңге көлемінде көмек берілген. Ал көліктері бүлінген немесе өртенген адамдарға қанша өтемақы төленетіні тергеу аяқталғаннан кейін белгілі болмақ.

7 ақпан кешке Жамбыл облысы Қордай ауданында қазақтар мен дүнгендер жанжалдасып, ресми дерек бойынша, 11 адам қаза тауып, 180-нен аса адам зардап шеккен.

Қордайдағы жанжал кезінде Қырғызстанмен шекараға жақын орналасқан, негізінен этникалық дүнгендер тұратын Масанчи, Сортөбе, Ауқатты ауылдарында, ресми мәлімет бойынша, 20 сауда орны мен 39 үй бүлініп, 47 көлік өртенді. Үкімет қақтығыста қираған үйлер мен сауда орындарын қалпына келтіруге көмектесетінін мәлімдеген.

Билік жанжал қарияның соққыға жығылуымен аяқталған жол үстіндегі кикілжіңнен шыққан деп мәлімдеді. Кикілжіңнен соң қазақтар (көбі – Қаракемер ауылының тұрғыны) жиналып, дүнгендер тұратын ауылдарға барған.

Қазақстан билігі жанжалға байланысты 120-дан астам қылмыстық іс қозғалғанын мәлімдеді. Наурыз айының басында бас прокуратура бұзақылық, адамды ұрып-соғу және полицияға бағынбау ісі бойынша бес адам ұсталғанын хабарлаған.

Қордайдағы жанжалдан соң Жамбыл облысының әкімі Асқар Мырзахметов бастаған бірнеше шенеунік және полиция департаментінің басшысы қызметтен кетті. Оның орнына сол кезде премьер-министрдің орынбасары болған Бердібек Сапарбаев тағайындалды.

Abai.kz