Қазақстанда коронавирус жұқтырған 121 адамның ахуалы нашар. Соның ішінде 22 науқастың жағдайы аса қатты ауыр деп бағаланған. Бұл туралы ҚР Денсаулық сақтау министрлігі мәлімдеді. 

«Қазіргі уақытта коронавирустық инфекциядан 4 557 адам ем қабылдауды жалғастыруда. Олардың арасында 37 өскіншек бала бар. Стационарларда 2 306 науқас жатыр. 2 251 адам амбулаториялық жағдайда емделуде.
Жалпы науқастардың арасында 121 адамның ахуалы нашар. Соның ішінде 22 науқастың ахуалы аса қатты ауыр деп бағалануда. 23 науқас өкпені жасанды желдету аппаратында жатыр»,- деді.

Айта кетейік, бұған дейін Денсаулық сақтау министрлігі коронавирустық инфекцияның екінші толқынына дайындалып жатқанын мәлімдеген болатын.

«Қазір Қазақстанда жалпы саны 4,8 мың науқас коронавирус пен пневмониядан емделіп жатыр. Әзірге жағдай тұрақты. Біз Еуропа мен ТМД елдерінде аурудың өсімін байқап отырмыз. Сондықтан жағдайды бақылауда ұстауымыз керек»,-деді министр Цой.

Соңғы мәлімет бойынша, елімізде коронавирустық инфекция жұқтырғандар саны 106855-ке жеткен.

Abai.kz