Алматы әуежайында ұшақ пен көліктің қатысуымен оқыс оқиға болды.  Әлеуметтік желілерде Алматы халықаралық әуежайының ұшу-қону жолағында болған оқиғаның видеосы пайда болды. Кадрларда көліктің ұшақтың қанатының астына кіріп кеткені көрінеді.

Алматы халықаралық әуежайының баспасөз қызметі магистраль мен такси жолының қиылысында ұшақ әуежай қызметтерінің бірінің көлігімен соқтығысқанын растады. Зардап шеккендер жоқ. Қазір тергеу жүріп жатыр.

Ұшақтың FlyJet.kz тиесілі екендігі туралы ақпаратты әуежай да растады. Ұшақ Бакуден ұшып, 22 қазан күні таңертең сағат 6:43-те Алматы әуежайына қонған.

Көлік полициясы басқармасы Қылмыстық кодекстің 344-бабының 1-бөлігімен (Жол қозғалысы қауіпсіздігі ережелерін және әуе көлігінің жұмысын бұзу) сотқа дейінгі тергеу басталғаны туралы хабарлады.

Abai.kz