10 қараша күні Алматы қаласы «Рухани жаңғыру жобалық кеңсесі» бастамасымен ұйымдастырылған «Ұшқан ұя» лонгрид марафонының салтанатты марапаттау рәсімі өтті.

Жоба қазақ әдебиеті классиктерінің шығармалары мысалында жастардың бойында адамгершілік ұстанымдарды қалыптастыруға, отбасылық дәстүрлерге құрметпен қарауды тәрбиелеуге бағытталған.

Жобада үлгілі отбасын құрметтеу қарастырылған. Іс-шара барысында марапаттау рәсімінің құрметті қонағы, Қазақстанның еңбек сіңірген қайраткері, кеңес және қазақ композиторы, домбырашы, күйші, 1974 жылы Воронежде өткен Бүкілодақтық халық аспаптары орындаушылар байқауының лауреаты, 1980 жылғы Қазақстан Ленин комсомолы сыйлығының лауреаты, 1994 жылы Түркияның Измир қаласында өткен Құрылтайда бүкіл түркі әлемінің «Озаны» (жаршысы) атанған адам Әбілтаев Шамиль Бисенғалиұлына сөз берілді. Аталған тұлға шағын сұхбаттан соң сахнада ән мен күй шырқап, жастарға домбыраның қасиетін ұғындырды.
«Ұшқан ұя» лонгрид марафонына Алматы қаласының шығармашыл студенттері мен жастары қатысты. Конкурсқа 33 қатысушыдан 37 өтінім беріліп, 3 қатысушы жүлдегер атанды.

Марафонның шешуші кезеңінде онлайн дауыс беру нәтижесі бойынша ең үздік деп танылған Құрманбек Шыңғыс Алисаитұлының Әзілхан Нұршайықовтың «Ақиқат пен аңыз» шығармасы мысалындағы жұмысы бірінші орынды қанжығасына байлады. Сәбит Мұқановтың «Адасқандар» шығармасын талдаған Құрманғали Дана Есқазықызының жұмысы екінші орынды, Мұхтар Әуезов «Абай жолы» романындағы Құнанбайдың Абай тәрбиесіндегі орны сипатталған Аяпбергенова Айнұр Нұрланқызының жұмысы үшінші орынды иеленді.

Марафон жеңімпаздары ақшалай сертификаттар және дипломдармен марапатталды. Сондай-ақ, жобаның барлық қатысушыларына алғыс хаттар табыс етілді.

Abai.kz