10 قاراشا كۇنى الماتى قالاسى «رۋحاني جاڭعىرۋ جوبالىق كەڭسەسى» باستاماسىمەن ۇيىمداستىرىلعان «ۇشقان ۇيا» لونگريد مارافونىنىڭ سالتاناتتى ماراپاتتاۋ ءراسىمى ءوتتى.

جوبا قازاق ادەبيەتى كلاسسيكتەرىنىڭ شىعارمالارى مىسالىندا جاستاردىڭ بويىندا ادامگەرشىلىك ۇستانىمداردى قالىپتاستىرۋعا، وتباسىلىق داستۇرلەرگە قۇرمەتپەن قاراۋدى تاربيەلەۋگە باعىتتالعان.

جوبادا ۇلگىلى وتباسىن قۇرمەتتەۋ قاراستىرىلعان. ءىس-شارا بارىسىندا ماراپاتتاۋ ءراسىمىنىڭ قۇرمەتتى قوناعى، قازاقستاننىڭ ەڭبەك سىڭىرگەن قايراتكەرى، كەڭەس جانە قازاق كومپوزيتورى، دومبىراشى، كۇيشى، 1974 جىلى ۆورونەجدە وتكەن بۇكىلوداقتىق حالىق اسپاپتارى ورىنداۋشىلار بايقاۋىنىڭ لاۋرەاتى، 1980 جىلعى قازاقستان لەنين كومسومولى سىيلىعىنىڭ لاۋرەاتى، 1994 جىلى تۇركيانىڭ يزمير قالاسىندا وتكەن قۇرىلتايدا بۇكىل تۇركى الەمىنىڭ «وزانى» (جارشىسى) اتانعان ادام ابىلتاەۆ شاميل بيسەنعاليۇلىنا ءسوز بەرىلدى. اتالعان تۇلعا شاعىن سۇحباتتان سوڭ ساحنادا ءان مەن كۇي شىرقاپ، جاستارعا دومبىرانىڭ قاسيەتىن ۇعىندىردى.
«ۇشقان ۇيا» لونگريد مارافونىنا الماتى قالاسىنىڭ شىعارماشىل ستۋدەنتتەرى مەن جاستارى قاتىستى. كونكۋرسقا 33 قاتىسۋشىدان 37 ءوتىنىم بەرىلىپ، 3 قاتىسۋشى جۇلدەگەر اتاندى.

مارافوننىڭ شەشۋشى كەزەڭىندە ونلاين داۋىس بەرۋ ناتيجەسى بويىنشا ەڭ ۇزدىك دەپ تانىلعان قۇرمانبەك شىڭعىس اليسايتۇلىنىڭ ءازىلحان نۇرشايىقوۆتىڭ «اقيقات پەن اڭىز» شىعارماسى مىسالىنداعى جۇمىسى ءبىرىنشى ورىندى قانجىعاسىنا بايلادى. ءسابيت مۇقانوۆتىڭ «اداسقاندار» شىعارماسىن تالداعان قۇرمانعالي دانا ەسقازىقىزىنىڭ جۇمىسى ەكىنشى ورىندى، مۇحتار اۋەزوۆ «اباي جولى» رومانىنداعى قۇنانبايدىڭ اباي تاربيەسىندەگى ورنى سيپاتتالعان اياپبەرگەنوۆا اينۇر نۇرلانقىزىنىڭ جۇمىسى ءۇشىنشى ورىندى يەلەندى.

مارافون جەڭىمپازدارى اقشالاي سەرتيفيكاتتار جانە ديپلومدارمەن ماراپاتتالدى. سونداي-اق، جوبانىڭ بارلىق قاتىسۋشىلارىنا العىس حاتتار تابىس ەتىلدى.

Abai.kz