Қазақстанда базалық зейнетақы мөлшері артады және ынтымақты зейнетақыны есептеу үшін ең жоғары табыс көлемі өседі. Бұл туралы ҚР Еңбек және халықты әлеуметтік қорғау министрлігінің ресми сайтында жарияланды.

Жақында Мемлекет басшысы Қазақстан халқына Жолдауында ең төменгі жалақы мөлшерін арттыру және зейнетақы жүйесін қайта қарау туралы айтты. Президенттің айтуынша, ең төменгі базалық зейнетақы мөлшерлемесін ең төменгі күнкөріс деңгейінің 70% — ына дейін, ал ең жоғары мөлшерлемені 120% - ға дейін жеткізу керек. Бұл бұған дейін қабылданған шешімдермен бірге 2025 жылға қарай жиынтық зейнетақыны орта есеппен 27% - ға ұлғайтуға мүмкіндік береді.

Осыған байланысты Еңбек министрлігі Қазақстанда базалық және ортақ зейнетақыны, сондай-ақ жұмыскердің зейнетақы жинақтары есебінен қалыптасатын БЖЗҚ-дан төленетін зейнетақы төлемін қамтитын көп деңгейлі зейнетақы жүйесі жұмыс істейтінін еске салды.

Бұл ретте ынтымақты зейнетақы жүйесі біртіндеп қысқаруда, өйткені оларды тағайындау кезінде 1998 жылғы 1 қаңтарға дейін, яғни жинақтаушы жүйе енгізілгенге дейін әзірленген еңбек өтілі ескеріледі. Сондықтан, министрлікте хабарлағандай, зейнетақы жүйесінің тиімділігін арттыру және азаматтарды жақсы зейнетақы  мөлшерімен қамтамасыз ету мақсатында әлеуметтік кодекс жобасы шеңберінде мынадай өзгерістер енгізу жоспарлануда:

«Зейнетақы жүйесінің тиімділігін арттыру және азаматтарды зейнетақының тиісті мөлшерімен қамтамасыз ету мақсатында Әлеуметтік кодекс жобасы шеңберінде мынадай өзгерістер енгізу ұсынылады:
Бірінші. 2023-2027 жылдар аралығындағы кезеңде ең төменгі базалық зейнетақының мөлшерін кезең-кезеңімен ең төменгі күнкөріс деңгейінің шамасынан 54-тен 70%-ға дейін, ең жоғары мөлшерін 100-ден 120%-ға дейін жеткізу көзделіп отыр.
Осы кезеңде базалық зейнетақы мөлшері орта есеппен 51%-ға дейін арттырылатын болады. Бұл ретте базалық зейнетақының орташа мөлшерінің жыл сайынғы өсуі шамамен 13% - ды құрайды және барлық 2 млн зейнеткерге қатысты болады.
Екінші. 2023 жылғы 1 қаңтардан бастап зейнетке шығатын азаматтар үшін ынтымақты зейнетақыларды есептеу үшін пайдаланылатын ең жоғары табыстың шамасын 46-дан 55 айлық есептік көрсеткішке дейін арттыру көзделеді», - деді ведомство.

Ұсынылып отырған шаралар 2025 жылға қарай жиынтық зейнетақыны орта есеппен 27%-ға (3 жыл ішінде – 109-дан 138 мың теңгеге дейін) арттыруға және жиынтық зейнетақыдағы мемлекеттік төлемдердің үлес салмағын арттыруға мүмкіндік береді. Осылайша, мемлекет қарт адамдар арасында кедейліктің өсуіне жол бермеу бойынша міндеттемелер қабылдайды.

Abai.kz